Facebook раҳбари Марк Цукерберг Жо Байденни АҚШ президентлик сайловлари ғолиби деб атади, деб хабар бермоқда BuzzFeed News 12 ноябрь куни бўлиб ўтган телеконференция аудиоёзувига таяниб.
Конференция давомида Цукерберг ўз ходимлари саволларига жавоб берган.
«Ишончим комилки, сайлов натижалари энди аниқ ва Жо Байден кейинги президентимиз бўлади. Одамларда сайлов умуман олганда адолатли ўтганига ишончни сақлаб қолиш муҳим. Ва бу Трампга овоз берган ўн миллионлаб одамларга тегишли», — деган Цукерберг.
Жамоатчиликка эса сайлов натижалари ҳақида Цукерберг ҳали ҳеч қандай изоҳ бермаган. Конференция давомида у нафақат Байденни сайловлар ғолиби ҳисоблашини, балки айрим штатларда қайта ҳисобланган сайлов натижаси Байденнинг ғалабасига таъсир қилмаслигини ҳам айтган.
«Биз қайта кўриб чиқишга ва судга беришга чақираётган одамларни кўряпмиз, бу аксарият ҳолларда уларнинг шахсий ҳуқуқи... Аммо бу одамларнинг сайлов натижасини ўзгартиришга борган сари жиддий ишонаётгани ачинарли ҳол», — деган Facebook раҳбари.
Конференция давомида Цукерберг, шунингдек, Дональд Трампни ёлғон маълумот тарқатганликда биринчи марта ошкора айблади.«Албатта, АҚШ президентининг ўзи бевосита шундай маълумот тарқатаётгани муаммодир», — деб таъкидлаган у.
АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади. Байден Трампнинг сайловдаги мағлубиятини тан олишдан бош тортишини шармандалик деб атади. АҚШ давлат котиби ҳокимият Трампнинг иккинчи маъмуриятига силлиқ топширилишини ваъда қилди.
Кўплаб мамлакатлар раҳбарлари, хусусан, Жанубий Корея президенти Мун Чже, Туркия президенти Ражаб Тоййиб Эрдўғон ва БМТ бош котиби Антониу Гутерриш Жо Байденни АҚШ президентлиги сайловидаги ғалаба билан табриклаган. Россия президентининг матбуот котиби Дмиртий Песков эса Путин «сайлов натижалари расман эълон қилинганидан кейин» табриклашини билдирган.
Изоҳ (0)