Зеленский яхши хабарларни украиналикларга ўзи етказиб туришга қарор қилди

Украина президенти Владимир Зеленский украиналикларга янгиликларни ўзи етказиб туришини айтди, деб ёзади «РБК» унинг Telegram каналига таяниб.

Зеленскийнинг айтишича, Украина телеканалларида «яхши янгиликлар йўқ».

«Шунинг учун сизларга иш кунидаги воқеалар ҳақида ўзим хабар бериб туришга қарор қилдим», — деди Зеленский. Унинг қайд этишича, буни «воситачиларсиз, манипуляцияларсиз, асосийси, ёлғонсиз» амалга оширади.

Давлат раҳбари маслаҳатчиси Михаил Подолякнинг маълум қилишича, Зеленский видеоблогни ишга тушириб, уни мунтазам равишда юритиб боришни режалаштирмоқда.

Айни пайтда Украина раҳбари касалхонада даволанмоқда: унда коронавирус аниқланган эди. Дастлаб президент ўзини ўзи яккалади, аммо бир неча кундан кейин касалхонага ётқизилди.

Эслатиб ўтамиз, 9 ноябрь куни Украина президенти девони Владимир Зеленскийда коронавирус аниқланганини маълум қилди. Шу куни президент девони раҳбари Андрей Ермак ҳам коронавирусга чалингани маълум бўлди. Зеленский Twitter’да ўзини яхши ҳис қилаётгани, ишлашда давом этаётгани ва касалликни енгиб ўтишига ишончи комил эканини таъкидлади.

Жонс Ҳопкинс университети маълумотларига кўра, Украинада коронавирусга чалиниш билан боғлиқ 504 423 та ҳолат қайд этилган. Беморларнинг 237 399 нафари соғайган, 9 422 нафари вафот этган.

Аввалроқ Украинада фавқулодда ҳолат режими узайтирилгани хабар қилинган эди.