Инсон ҳуқуқлари ҳимоячилари Эфиопияда оммавий қирғин содир бўлганини маълум қилди

Эфиопия шимолидаги Тиграй вилоятида оммавий қирғин содир бўлди. Бу ҳақда Amnesty International инсон ҳуқуқларини ҳимоя қилиш ташкилоти ҳисоботига таяниб, «РИА Новости» хабар берди.

«Amnesty International Тиграй вилоятининг жануби-шарқида жойлашган Май-Кадра шаҳрида 9 ноябрга ўтар кечаси ўнлаб, балки юзлаб инсонлар сўйиб ёки чопиб ташлангани тўғрисидаги маълумотларни бугун тасдиқлай олади», — дейилади хабарда.

Ташкилот марҳумларнинг жасадларига оид суратлар ва видеоларни экспертизадан ўтказган Crisis Evidence Lab лабораторияси маълумотларига таянмоқда. Тасдиқланишича, суратлар яқинда Май-Кадра шаҳрида олинган. Лаборатория сурат ва видеоларнинг геопозициясини сунъий йўлдошлар ёрдамида аниқлаган.

Маълум қилинишича, аксарият ҳалок бўлганларнинг жасади шаҳар марказидаги Эфиопия тижорат банки биноси яқинида ва қўшни Хумера шаҳри йўллари четидан топилган.

Ҳуқуқ ҳимоячиларининг таъкидлашича, улар Тиграй шаҳридаги тинч аҳолининг оммавий қирғинига жавобгар шахсларни аниқлай олмаган. Бироқ Май-Кадрадаги қирғиндан сўнг омон қолган гувоҳларнинг сўзларига кўра, уларга «Тиграй озодлик халқ фронти» ҳужум қилган.

Май-Кадрада ҳалок бўлганларнинг аниқ сони ҳозирча маълум эмас. Бироқ маҳаллий ОАВ маълумотларига кўра, 500 га яқин одам қирғин қурбонига айланган.