Тоғли Қорабоғ ҳудудида жанговар ҳаракатларни тўхтатиш ҳақидаги келишувга асосан Озарбайжон назорати остига ўтиши керак бўлган Калбажар тумани аҳолиси ўз уйларини оммавий равишда тарк этишни бошлади, баъзилар эса ўз уйларини ёқиб юбормоқда. Бу ҳақда «РБК» хабар берди.
«Спутник Арманистон» агентлиги томонидан эълон қилинган видеода Калбажар аҳолиси ўз ерларини ташлаб, ҳудуддан чиқиб кетаётганини кўриш мумкин. «Қорабоғда шимолий йўл машиналар билан тўлган», — дейилади хабарда.
Қайд этилишича, автомобиллар оқимида кўплаб микроавтобуслар ва юк машиналари бор. «Одамлар олиб кетиш мумкин бўлган барча нарсани олиб кетмоқда — уй жиҳозлари, мебель, ҳайвонлар. Баъзилар эса ўз уйларини ёқиб юбормоқда», — дейилади агентлик хабарида.
Агентлик маълумотларига кўра, Озарбайжон назоратига ўтиши керак бўлган туманларда одамлар дўконларни, уйларни ва электр нимстанцияларини бузиб, олиб кетмоқда.
Тоғли Қорабоғда Озарбайжон ва Арманистон ўртасидаги жанговар ҳаракатлар 27 сентябрь куни қайта бошланди. Иккала давлат ҳам ҳарбий ҳолат жорий қилди ва бир-бирини тинч аҳолига қарши ҳужумларда айблади. Қурбонлар ҳам ҳарбий хизматчилар, ҳам оддий одамлар бўлди. 9 октябрда Москвада зиддиятли томонларнинг вакиллари билан музокаралар олиб борилди, натижада жанговар ҳаракатларни тўхтатиш тўғрисида қарор қабул қилинди. Ўт очишни тўхтатиш 10 октябрь куни эрталаб кучга кирди.
10 ноябрга ўтар кечаси Арманистон бош вазири Никол Пашинян Озарбайжон ва Россия президентлари Илҳом Алиев ва Владимир Путин билан Тоғли Қорабоғда ўт очишни ва жанговар ҳаракатларни тўхтатиш тўғрисида келишув имзолади. Ҳужжатга кўра, Боку ва Ереван эгаллаб турган позицияларида тўхтаб, Тоғли Қорабоғ ҳудудининг бир қисми, шу жумладан, стратегик жиҳатдан муҳим Шуша шаҳри Озарбайжонга ўтади. Шартларда айтилишича, Арманистон 20 ноябргача Агдам ва Калбажар туманларини, 1 декабрга қадар Лачинни Озарбайжонга қайтариши керак. Шунингдек, келишув минтақага Россия тинчликпарвар кучларини киритишни назарда тутади.
Изоҳ (0)