Nyu-Hempshir shtatidagi Diksvill-Notch shaharchasida AQSh prezidentligiga o‘tkazilgan saylov natijalari e’lon qilindi. Saylovchilarning barcha beshta ovozini Demokratlar partiyasidan bo‘lgan nomzod, AQShning sobiq vitse-prezidenti Jo Bayden olgan, deb xabar beradi CNN.
Diksvill-Notch saylov natijalarini e’lon qilgan AQShdagi birinchi shaharlardan biriga aylandi. Shahardagi saylov uchastkasi yarim tundan so‘ng ochilgan. Ovoz berish imkoniyatiga ega bo‘lgan barcha bir necha daqiqa ichida o‘z huquqidan foydalangan.
Diksvill-Notchga qo‘shni bo‘lgan Millsfild shahrida ham saylov uchastkalari yarim tunda ochilgan va ularning hisob-kitobi bo‘yicha, Respublikachilar partiyasidan bo‘lgan nomzod, AQShning amaldagi prezidenti Donald Tramp g‘oliblikni qo‘lga kiritgan. Unga saylovchilarning 16 nafari, Baydenga — besh nafari ovoz bergan.
CNN’ning ta’kidlashicha, Diksvill-Notch doim jurnalistlar e’tiborini o‘ziga tortib keladi, biroq shahardagi saylov natijalari odatda AQShning navbatdagi prezidenti kim bo‘lishini oldindan aytish imkonini bermaydi. 2016-yilda ham ushbu shaharda Hillari Klinton g‘olib bo‘lgandi, biroq saylovchilar kollegiyasi yakuniy g‘oliblikni Trampga bergan.
So‘nggi ma’lumotlarga ko‘ra, hozirga qadar AQShdagi saylovchilarning 99 milliondan ortig‘i prezidentlik saylovlarida qatnashib ulgurgan. Bu umumiy ovoz beruvchilar sonining 40 foizini tashkil etadi.
Izoh (0)