Қозоғистон пойтахти Нур-Султон шаҳрида қурол, портловчи моддалар ва портловчи воситалардан фойдаланиш билан боғлиқ жиноятларнинг олдини олиш мақсадида «Қурол-2020» тадбири ўтказилмоқда, дея хабар бермоқда шаҳар ишчи ишлар бошқармаси.
Қайд этилишича, Жиенқулов кўчасида 38 ёшли Ўзбекистон фуқароси тўхтатилганда унинг полиэтилен пакетидан милтиқ топилган.
Мутахассисларнинг хулосасига кўра, силлиқ стволли ўқотар қурол – 16 калибрли ов милтиғи қўлда ясалгани аниқланган. Милтиқнинг завод рақами ўчирилган, қурол ўқ отишга яроқли. Бундан ташқари, полиция 20 та патронни мусодара қилган.
Тезкор профилактика тадбири давомида қурол, ўқ-дорилар, портловчи моддалар ва мосламаларни ноқонуний ишлаб чиқариш ва сотиш билан боғлиқ жами 11 та жиноят аниқланди. Улар юзасидан Қозоғистон Жиноят кодексининг 287-моддаси (қуролларни, ўқ-дориларни, портловчи моддаларни ва портловчи мосламаларни ноқонуний олиш, ўтказиш, сотиш, сақлаш, ташиш ёки олиб юриш) бўйича тергов ҳаракатлари олиб борилмоқда.
Аввалроқ Тошкентда Камерун фуқаросини тутқунликда сақлаган жиноий гуруҳ қўлга олингани, Ўзбекистоннинг Туркиядаги элчихонасида портлаш бўлиши ҳақида ёлғон хабар берган фуқаро аниқлангани ҳамда Россия Истанбулда одам ўлдиришда айбланаётган ўзбекистонликни Туркияга топширгани ҳақида хабар қилинганди.
Изоҳ (0)