Туркиянинг Истанбул шаҳри яқинидаги шимолий Мармара автомагистралида 18 август куни йўловчи автобус ағдарилиб кетди. Дастлабки маълумотларга кўра, ҳодиса оқибатида 3 киши ҳалок бўлиб, яна 20 киши жароҳатланди. Бу ҳақда DHA нашри хабар берди.
Маълум қилинишича, ҳодиса маҳаллий вақт билан соат 06:15 атрофида Санжактепе туманининг Пашакўй ҳудудида юз берган. Текирдағ шаҳрига ҳаракатланаётган автобус ҳайдовчининг бошқарувни йўқотиши оқибатида йўл четидаги тўсиқларга урилиб, ағдарилиб кетган. Автобусда жами 35 йўловчи бўлган. Жароҳат олганлар тез ёрдам машиналари билан яқин касалхоналарга олиб кетилган.
Вилоят ҳокимлиги ҳодиса юзасидан расмий баёнот бериб, авария бўйича тергов ишлари бошланганини маълум қилган. Билдирилишича, воқеа жойида жандармия (полиция) ходимлари автобусни йўлдан олиб чиқиш ишларини бошлаб юборган. Махсус эвакуатор ёрдамида транспорт воситаси шатакка олинмоқда.
Бундан олдинроқ, Ироқда ҳам шунга ўхшаш воқеа юз берганди. Унда эронлик зиёратчиларни олиб кетаётган автобус ҳалокатга учраб, 5 киши ҳалок бўлган ва 57 киши жароҳатланган. Автоҳалокат Басра–Шаламчеҳ йўналишида содир бўлган. Зиёратчилар Арбаин маросимига йўл олган. Йўл транспорт ҳодисаси автобуснинг йўл четидаги тўсиққа урилиши сабабли юзага келган.
Изоҳ (0)