Тошкентнинг Чилонзор туманида қаровсиз қолдирилган машина ичидан пуллар ва «Отчопар» бозоридан Nexia-3’ни ўғирлаб кетган шахс қўлга олинди. Бу ҳақда ИИВ ахборот хизмати хабар берди.
Маълумотларга кўра, 15 август куни соат тахминан 15:00 ларда Чилонзор тумани «Мевазор» маҳалласи, 3-тор кўчасида Malibu автомобили ичидан 4200 доллар ва 6,2 миллион сўм ўғирлаб кетилган. Тезкор тергов гуруҳи ва Жиноят қидирув бўлими ходимлари томонидан олиб борилган суриштирув ишлари давомида қонунбузарнинг шахси аниқланган.
Ушбу жиноятни қашқадарёлик 17 ёшли М. амалга оширгани маълум бўлган ҳамда ҳолат бўйича Жиноят кодексининг 169-модда 3-қисми (ўғрилик) «а» банди бўйича жиноят иши қўзғатилган.
«Malibu-2’нинг ойналари очиқ турган экан. Машинанинг ‘бардачок’ини очдим, салонидаги ‘барсетка’дан 4200 доллар чиқди…», — дейди гумонланувчи йигит.
Шунингдек, М. 4 сентябрь куни «Отчопар» бозори олдида автотураргоҳда қаровсиз қолдирилган оқ рангли Nexia-3 автомобилини олиб қочган. Олиб борилган тезкор қидирув ишлари давомида машина Қашқадарёда эканлиги аниқланган ва у вилоятда ҳаракатланаётган вақтида қўлга олинган.
Ҳозирда ҳолат юзасидан тергов ҳаракатлари олиб борилмоқда.
Изоҳ (0)