Наманганда севган қизига пичоқ урган ва ўзи ҳам яраланиб, шифохонага ётқизилган йигит эҳтиёт чораси сифатида қамоққа олинди. Бу ҳақда «Дарё» мухбири Азизбек Абдувалиев хабар бермоқда.
Ҳодиса 2020 йил 15 сентябрь куни Косонсой тумани, «Такаранг» маҳалласи ҳудудида жойлашган «Намуна ширин» фермер хўжалиги дала майдонида рўй берган. Беш йил давомида бир-бирига кўнгил қўйиб келган 20 ёшли қиз ва 21 яшар йигит қизнинг уйидагилари турмуш қуришларига рози бўлмагани ва бошқа йигитга унаштириб қўйганлиги сабабли жонларига қасд қилишга қарор қилади.
Дастлаб қиз йигитнинг, сўнг йигит қизнинг қорин қисмига бир маротаба пичоқ уриб, тан жароҳати етказади. Шу куни соат 11:40 атрофида Ички ишлар навбатчилик қисмига қиз оғир тан жароҳати билан туман тиббиёт бирлашмасига олиб келинганлиги ҳақида хабар келиб тушади.
Кўрсатилган тиббий муолажаларга қарамай, кўп қон йўқотганлиги ва ички аъзолари жиддий шикастлангани сабаб қиз шифохонада оламдан ўтади. Йигитнинг жароҳатлари эса унчалик жиддий бўлиб чиқмайди ва шифохонага ётқизилади.
Косонсой тумани прокуратураси терговчиси Азизбек Мирзакаримовнинг маълум қилишича, мазкур ҳолат юзасидан Ўзбекистон Республикаси Жиноят кодексининг 97-моддаси, 1-қисми билан жиноят иши қўзғатилган. Йигит ушбу ишга айбланувчи сифатида жалб этилиб, унга нисбатан қамоққа олиш тарзидаги эҳтиёт чораси қўлланган.
Ҳозирда туман прокуратураси томонидан тергов ҳаракатлари олиб борилмоқда.
Эслатиб ўтамиз, олдинроқ Наманган вилоятининг Учқўрғон туманида бошқага унаштирилган қизни рашк қилиб, унга 5 маротаба пичоқ урган 19 яшар йигит 11 йилга озодликдан маҳрум этилганди.
Изоҳ (0)