Америка Қўшма Штатлари президенти Дональд Трамп Россия етакчиси Владимир Путин билан Аляскада бўлиб ўтган музокараларни тўхтатиш ҳақида ўйлаган. Сабаби Путин Украинанинг беш ҳудуди, жумладан Донецк вилояти бўйича максимал талабларни илгари сурган. Бу ҳақда Axios нашри хабар берди.
Манбага кўра, 16 август куни ўтган музокараларда Путин Россия Украинанинг беш вилояти устидан тўлиқ назорат ўрнатишни истаётганини билдирган.
Қайд этилишича, Путин талабларида шунчалик муросасиз кўринганки, Трамп музокаралардан чиқишга тайёр бўлган.
“Гап Донецк вилояти ҳақида кетаётган экан, агар бу борада ҳеч қандай муроса бўлмаса, унда музокарани давом эттиришнинг маъноси йўқ”, деган Трамп Путинга.
Нашр манбаларининг таъкидлашича, Путин кейинчалик бу талабидан воз кечган.
Ғарб матбуотига кўра, Владимир Путин музокараларда Украинадан Донецк ва Луганск вилоятларини Россияга беришни, Қримни эса Россия ҳудуди сифатида тан олишни талаб қилган. Бундан ташқари, у Запорожье ва Херсон вилоятларидаги фронт чизиғини “музлатиб қўйиш” тарафдори бўлган.
Украина президенти Владимир Зеленский эса Киев ўз ҳудудларини Россияга “совға қилиш” ниятида эмаслигини таъкидлаган.
Изоҳ (0)