«Kun.uz» Қашқадарёдаги ҳолат бўйича ўчириб ташланган мақоласини қайта эълон қилди ва ОАВга босим ўтказилганини билдирди

«Kun.uz» нашрида Қашқадарёнинг Китоб туманида маҳаллий маъмурият камбағаллик рўйхати («темир дафтар»)га киритилмаган шахсларга ер ажратиб берилгани тўғрисида мақола эълон қилингани, бироқ у кейинроқ ўчириб ташлангани тўғрисида хабар берилганди. Ўчириб ташланган материал «Daryo.uz» ва «Gazeta.uz» нашрларида эълон қилинганидан сўнг ижтимоий тармоқларда блогерларнинг кенг муҳокамасига сабаб бўлди. 19 сентябрь куни «Kun.uz» ушбу мақолани қайта эълон қилди ва уни «турли шахслар ўз амал ва имкониятларидан фойдаланиб, қўнғироқлар билан мақолани сайтдан ўчиртиришганини» билдирди.

«‘Темир дафтар’ бўйича навбатдаги спектакль. Ролларда яна маҳалла раиси ва туман мутасаддилари» сарлавҳаси остидаги мақола  15 сентябрь куни соат 21:20 да эълон қилинган (у 15 минг мартадан кўпроқ ўқилган), аммо кўп ўтмай ўчириб ташланган ва унинг нусхаси Google кэшида сақланиб қолган.

Мухбирлар томонидан Қашқадарёга уюштирилган пресс-тур чоғида тайёрланган ушбу мақола эълон қилингач, турли шахслар ўз амал ва «имконият»ларидан фойдаланиб, қўнғироқлар билан мақолани сайтдан ўчиртиришди. Бироқ бу хатти-ҳаракат тескари самара бериб, журналист ва блогерларнинг диққат марказига тушди ва мақола бошқа платформалар орқали янада кенгроқ тарқала бошлади.

Чунки мақолада ҳеч кимга туҳмат қилинмаган, воқеа бор бўй-басти билан кўрсатилган. Зеро давлат раҳбари ва ҳукуматнинг аҳолига ижтимоий ёрдам бериш борасидаги қарор ва топшириқларини бажаришда жойлардаги раҳбарлар ҳайбаракаллачилик ва кўзбўямачиликка йўл қўйишаётгани ҳаммада ҳақли эътироз уйғотмоқда.

Боз устига, давлат раҳбари ҳар чиқишида сўз эркинлигини таъминлаш ва жамоат назоратини кучайтириш ҳақида гапириб турган бир даврда эскича ишлашга ўрганиб қолган айрим амалдорларнинг кўзбўямачилик ва сўз эркинлигини бўғишга қаратилган хатти-ҳаракатлари бундан буён мана шундай тескари самара беришини англаб олишлари керакмикан...

«Kun.uz» таҳририяти

Эслатиб ўтамиз, 2019 йилнинг ноябрида Ўзбекистон Президенти бошчилигида ўтказилган йиғилишларнинг бирида Шавкат Мирзиёев сўнгги вақтларда айрим мутасаддилар ва ОАВ вакиллари ўртасида кузатилган зиддиятли ҳолатларга эътибор қаратиб, раҳбарларни халқ ва ОАВ билан мулоқотда кибрга берилмасликка чақирганди. Ўзбекистон Конституцияси қабул қилинганининг 27 йиллиги муносабати билан ўтказилган тантанали маросимдаги нутқида эса «оммавий ахборот воситалари одамларга ҳақиқий муаммоларни қанча кўп етказса, раҳбар сифатида улардан миннатдор бўлиши» ва «бу очиқлик ҳеч қачон орқага қайтмаслигини» таъкидлаган эди.Шу йилнинг август ойининг бошларида Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов ОАВ ва блогернинг «овозини ўчириш»га уриниш билан ҳеч қандай натижага эришиб бўлмаслигини айтганди. Шунингдек, Алламжонов «Улар» лойиҳасига берган интервьюсида ҳам Ўзбекистонда журналист ва блогерлар гапирган гапи учун қамалмаслиги кераклигини таъкидлаган.