Беларусь президенти Александр Лукашенко мамлакатдаги вазиятни ҳал қилиш учун хорижий воситачилар иштирокида мулоқот ўтказмаслигини айтди, дея хабар бермоқда «Белта».
«Беларусга мамлакат учун хорижий ҳукумат тузиш таклиф этилди. Эшитинг, бизда конституция бўйича тузилган оддий ҳукумат бор. Бизга ҳеч қандай хорижий ҳукуматлар ва воситачиларнинг кераги йўқ. Менимча, ушбу республикалар раҳбариятини хафа қилмасдан айтмоқчиман, сиз ўз мамлакатингизда тартиб ўрнатасиз», — деди Лукашенко Беларусь Мудофаа вазирлигининг стратегик бошқарув марказида бўлиб ўтган йиғилишда.
Лукашенко хорижда тузилган ҳукумат ҳеч қачон мамлакатни бошқармаслигини айтиб, вазиятни ўзлари ҳал қилишини маълум қилган.
«Мамлакатда нималар бўлаётганидан мен каби хабардорсиз. Улар аста-секин вазиятни ва жамиятимизни ўзгартиришни бошламоқда ёки давом эттирмоқда. Биз меҳнат жамоаларига мурожаат қилишимиз керак. Мен бу ҳақда кўп маротаба гапирганман. Шуни яна бир марта айтмоқчиманки, бундан ҳеч нарса чиқмайди. Мамлакатни ҳеч кимга бермаймиз», — деди Лукашенко.
Аввалроқ Лукашенко Россия президенти Владимир Путин билан Беларусдаги вазиятни муҳокама қилди. Раҳбарлар барча муаммолар тез орада ҳал қилинишига ишонч билдирди, шунингдек, иттифоқчилик муносабатларини мустаҳкамлашга қарор қилишганини маълум қилди.
Шунингдек, июль ойи охирида Беларусда ҳибсга олинган «Вагнер» хусусий ҳарбий компаниясининг 32 нафар аъзоси Россияга қайтарилгани хабар қилинган.
Беларусдаги президентлик сайлови
Беларусь президенти сайлови кампанияси давомида амалдаги президентга рақобатчи бўлган номзодларга турли тазйиқлар ва таъқиблар уюштирилди. Мамлакатда Александр Лукашенконинг рақибларини қўллаб-қувватлаш учун митинглар бўлиб ўтди.Беларусда 9 август куни президент сайлови бўлиб ўтди. Сайлов куни Минск марказида ҳарбий техника пайдо бўлди. Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди.
Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,08 фоиз овоз тўплаган. Мухолифат номзоди Светлана Тихановская эса расмий маълумотларга кўра, 10,09 фоиз овоз олган.
Натижалар эълон қилингач, Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
Светлана Тихановскаянинг штаби 10 август куни кечаси у Беларусь Марказий сайлов комиссиясига борганидан сўнг йўқолиб қолганини билдирган. Кечга яқин Тихановская алоқага чиққан, бироқ қаерда эканлигини ошкор этмаган. Беларусь Давлат хавфсизлик қўмитаси Светлана Тихановскаяга уюштирилган суиқасднинг олди олинганини маълум қилган.
11 август куни Тихановская Беларусдан чиқиб кетгани ва Литвада эканлиги маълум бўлди. Унинг штаби томонидан маълум қилинишича, президентликка номзод бу ишни ўз хоҳиши билан қилмаган, балки штаб раҳбари Мария Морознинг озод этилиши эвазига ҳукумат босими остида амалга оширган.
Шунингдек, 11 август куни Тихановскаянинг видеомурожаати эълон қилинган. Унда Тихановская ўзининг кетиши «оғир қарор» бўлганини маълум қилган. «Мен дуч келган бундай танловда қолишни Худо кўрсатмасин», — деган Тихановская.
Кейинроқ Беларусь ҳукумати тарафдори бўлган Telegram канал Тихановскаянинг бошқа бир видеомурожаатини эълон қилди. Номзод мазкур мурожаатда камерага қарамасдан, варақдан ўз тарафдорларига қаратилган ва намойишларни тўхтатиш ҳақидаги чақирувни ўқиб берган.
Ҳозирда Литва ҳукумати томонидан Светлана Тихановскаяга бошпана ва қўриқчилар тақдим этилган.
Александр Лукашенкодан ташқари, президентликка номзодларнинг барчаси сайлов натижаларидан норозилигини билдириб, мамлакат Марказий сайлов комиссиясига шикоят киритган.
Беларусда 9 августдан буён норозилик намойишлари ва намойишчиларни қўллаб-қувватлаш учун чиқишлар давом этмоқда.
Изоҳ (0)