Belarus davlat axborot agentligi “Belta” 29-iyul kuni Minskda hibsga olingan jangarilari haqida ma’lumot berdi.
Ro‘yxatdan 33 kishining familiyasi o‘rin olgan. Gumonlanuvchilardan biri mamlakat janubida qo‘lga olingan. Jangarilarning hammasi rossiyaliklar, “Vagner” xorijiy harbiy kompaniyasiga ishlashadi, deya xabar qilgan “Belta”.
Agentlik axborotiga ko‘ra, Belarus huquqni muhofaza qiluvchi organlariga 200 nafarga yaqin jangarilar saylov kampaniyasi vaqtida mamlakatdagi vaziyatni beqarorlashtirish maqsadida xorijdan kirib kelgani haqida ma’lumot olgan.
“Belta” agentligining keyingi xabarida rossiyaliklardan iborat bir guruh shaxslar avvaliga Minskdagi mehmonxonalardan biriga joylashgani, keyinchalik Minsk tumanidagi sanatoriyga ko‘chgani qayd etilgan.
“Ular rossiyalik turistlarga xos bo‘lmagan xulq-atvor namoyish qilgan va militari uslubida kiyinib yurgan. Spirtli ichimliklar iste’mol qilmagan, ko‘ngilochar maskanlarga bormagan, omma oldiga behuda chiqishdan tiyilgan. Gumonlanuvchilar kichik guruhlarga bo‘linib hududni o‘rgangan va sanatoriy atrofini aylangan”, — deyiladi agentlik ma’lumotida.
Gumonlanuvchilar respublika davlat xavfsizlik qo‘mitasi (KGB) tomonidan OMON guruhi bilan hamkorlikda hibsga olingan. Belarus tergov qo‘mitasi rossiyaliklarga nisbatan tergovni olib bormoqda.
9-avgustda Belarusda navbatdagi prezidentlik saylovlari bo‘lib o‘tadi. Saylovlarda 1994-yildan beri davlatni boshqarib kelayotgan Aleksandr Lukashenko ham ishtirok etmoqda. Saylovoldi targ‘ibot tadbirlari vaqtida norozilik namoyishlari bo‘lib o‘tmoqda, undan avval prezidentlikka nomzodini qo‘ymoqchi bo‘lganlarning aksar qismi, xususan, asosiy raqobatchi Viktor Babariko hibsga olingan.
Mavzuga doir: Belarus prezidentligiga nomzod Svetlana Tixanovskaya tahdidlar sabab farzandlarini mamlakatdan olib chiqib ketdi
14-iyulda Belarusda prezidentlik saylovlari oldidan amalga oshirilayotgan kampaniya vaqtida 700 nafardan ziyod odam hibsga olingani, ularning har beshtadan bittasi ma’muriy qamoqqa tushgani xabar qilingan.