Ҳиндистонда коронавирусга қарши Covaxin вакцинаси клиник синовининг биринчи босқичи муваффақиятли ўтказилмоқда. Бу ҳақда 14 август, жума куни The Economic Times газетаси хабар берди.
«Дастлабки натижалар вакцинанинг хавфсизлигини кўрсатмоқда. Синов иштирокчиларида ножўя таъсир кузатилмади. Синовларнинг биринчи босқичи август охирларида якунланади. Иккинчи босқичда вакцинанинг самарадорлигини аниқлашга ҳаракат қиламиз», — деган тадқиқот раҳбари Савита Верма.
Қайд этилишича, Covaxin вакцинаси Bharat Biotech компанияси томонидан Ҳиндистон тиббий тадқиқотлар кенгаши билан ҳамкорликда Пуне миллий вирусология институтидан олинган SARS-CoV-2 штаммига асосланган ҳолда ишлаб чиқилган.
Синовлар Ҳиндистондаги 12 та тиббиёт марказида ўтказилаётган бўлиб, унда 375 нафар кўнгилли иштирок этмоқда. Синовлар муваффақиятли ўтса, Covaxin препарати 2021 йилнинг биринчи ярмида фойдаланиш учун тайёр бўлади.
Айни пайтда дунё бўйлаб бир неча вакциналар ҳозирда якуний синов жараёнида. Россия биринчилардан бўлиб COVID-19’га қарши вакцинани рўйхатдан ўтказди. Ушбу вакцинанинг икки дозаси камида 10 доллардан сотилиши кутилмоқда.
АҚШда Moderna компанияси ишлаб чиқарган вакцина 30 минг кишида якуний синовдан ўтказилмоқда. Қозоғистонда эса 1 август куни COVID-19’га қарши биринчи эмлаш ўтказилган. Германияда коронавирус вакцинаси 2020 йил охирида фойдаланиш учун тасдиқланиши кутилмоқда
Аввалроқ ЖССТнинг соғлиқни сақлаш соҳасидаги фавқулодда вазиятлар бўйича дастури директори Майкл Райан тадқиқотчилар коронавирусга қарши вакциналар яратишда салмоқли натижаларга эришгани, бироқ улар 2021 йилдан эртароқ қўлланилмаслигини айтганди. Тедрос Гебрейесус эса коронавирусга қарши яратилаётган амалдаги вакциналар омадсизлик билан якун топиши мумкинлигини билдирган.
Мавзуга доир: CNN: Россия коронавирусга қарши вакцина ишлаб чиқишда АҚШга ёрдам таклиф қилди. Вашингтон ёрдамни рад этди
Изоҳ (0)