Сўнгги бир йил ичида АҚШ президенти Дональд Трампнинг соф бойлиги (қарзлардан ташқари) 10 фоизга ёки 300 миллион долларга камайди, бу унинг Оқ уйдаги фаолияти давомида энг ёмон пасайиш бўлди. Бу ҳақда Bloomberg хабар берди.
Bloomberg Billionaires Index’нинг тузувчиларига кўра, Трамп президент этиб сайланганида 3 миллиард долларга эга эди, гарчи унинг ўзи 10 миллиард долларга эгалигини даъво қилса ҳам, ўшандан бери унинг бойлиги гоҳ кўпайиб, гоҳ пасайган. Аммо янги сайловлар арафасида унинг бойлиги 2,7 миллиард долларга тушиб кетган.
Bloomberg экспертлари Трампнинг 540 миллион долларлик қарзларини олиб ташлаб, унинг активларини айнан шу миқдорда баҳолаган.
«Bloomberg 2015 йилда Трампнинг бойлигини кузатишни бошлаганидан бери бу энг чуқур пасайиш бўлди. Буларнинг барчаси Trump Organization компаниясининг офис бинолари портфелидаги даромадларнинг пасайиши билан бошланди, кейин вазият коронавирус пандемиясининг кўчмас мулк бозорларига таъсири туфайли янада оғирлашди», — дея таъкидлаган Bloomberg.
Агентлик маълумотларига кўра, Трампга Нью-Йоркнинг Бешинчи авенюсидаги машҳур Trump Tower, Уолл стритдаги 70 қаватли Trump Building ва бошқа бинолар қийматининг пасайиши энг кўп таъсир кўрсатди. Bloomberg Манхэттендаги кўчмас мулкни доимий равишда пул келтирадиган «ишчи отлар» деб атаган. Бироқ 2018 йилда Trump Organization ўзининг асосий ижарачиларидан бирини йўқотди — Nike компанияси 57-кўчада жойлашган ва Niketown деб аталадиган улкан бинодан кўчиб чиқди. Bloomberg’нинг таъкидлашича, илгари Forbes 253 миллион долларга баҳоланган бино учун янги ижарачини топиш, айниқса Нью-Йоркдаги чакана савдога COVID-19 берган зарбадан кейин жуда қийин бўлган.
Шу билан бирга, Трампга тегишли гольф майдонларининг нархи тушди, Bloomberg буни АҚШдаги ёшлар орасида гольф ўз машҳурлигини йўқотаётгани билан изоҳлайди.
Шу билан бирга, Bloomberg Трампнинг бизнесида ижобий ҳолатлар мавжудлигини таъкидлайди. Президентнинг шахсияти нисбатан турли муносабатларга қарамай, Trump бренди бизнеси ўтган йил давомида унга ўнлаб миллион доллар даромад келтирди. Унинг меҳмонхоналари ва гольф клублари республикачилар орасида машҳур бўлиб келмоқда ва қўшимча равишда президентнинг қўриқчилари ва ходимлари билан бирга у ерда бўлиш учун ғазна томонидан қилинадиган тўлов натижасида катта молиявий ёрдам олади. Шунингдек, Трамп 1987 йилда чиқарилган «Битимлар тузиш санъати» китобини сотишдан 1 миллион доллар ишлаб топди.
Forbes журнали мутахассислари капитални баҳолашнинг бошқа методологиясидан фойдаланган ҳолда, Трампнинг бойлигини айни вақтда 2,1 миллиард долларга баҳоламоқда. 2019 йил октябрида эълон қилинган энг бой америкаликлар рейтингида президентнинг бойлиги 3,1 миллиард долларга баҳоланганди. Шунга қарамай, 2020 йил апрель ойида Forbes ўз баҳосини пасайтирди. Унинг баҳоси дарҳол 1 миллиард долларга пасайди, бу COVID-19 пандемияси сабаб бўлган инқироз билан боғланди.
Изоҳ (0)