CNN: Россия коронавирусга қарши вакцина ишлаб чиқишда АҚШга ёрдам таклиф қилди. Вашингтон ёрдамни рад этди

Россия расмийлари коронавирусга қарши вакцина ишлаб чиқиш масаласида америкаликларга «мисли кўрилмаган ҳамкорлик» таклиф қилди. Бу ҳақда Москвадаги манбаларига таяниб CNN хабар бермоқда.

Қайд этилишича, унда Россия вакцинасини Америка фармацевтика компанияларида ишлаб чиқариш ҳақида гап борган.

АҚШ бу таклифни рад этган. «Америка томондан Россияга нисбатан умумий ишончсизлик бор, шу сабабли Россия технологиялари АҚШда қабул қилинмайди», — деган CNN суҳбатдошларидан бири.

Аммо Америка расмийларининг билдиришича, ҳамкорлик қилишдан бош тортиш Россия вакцинасининг хавфсизлигига шубҳа қилингани билан боғлиқ. «Улар вакцинанинг кенг миқёсда ишлаш-ишламаслигини аниқлаш учун одамларда жуда кам синов ўтказди», — деган нашрнинг Америка ҳукуматига яқин бўлган манбаси.

CNN’да бу ҳақда материал чиққанидан кейин Россия Соғлиқни сақлаш вазирлиги коронавирусга қарши вакцина ишлаб чиқариш бўйича ҳамкорлик қилиш борасида АҚШга расмий таклиф юборилмаганини билдирган.

Россия президенти Владимир Путин коронавирусга қарши биринчи вакцина рўйхатдан ўтказилганини 11 август куни маълум қилганди. У Гамалея номидаги институт томонидан яратилган. Путиннинг сўзларига кўра, вакцина «барқарор иммунитет шакллантиради ва барча зарур текширувлардан ўтган». Амалда эса Гамалея институти вакцинаси ишлаб чиқишнинг дастлабки босқичида турибди. Унда кенг миқёсли клиник текширувлар ўтказилмаган. Илмий журналларда эса синов натижалари ҳақида ҳеч қандай мақолалар йўқ.