Ўзбекистонда 18 июнь соат 23:00 дан 19 июнь соат 23:00 га қадар коронавирус юқтириб олиш билан боғлиқ 179 та янги ҳолат қайд этилди. Бир кун аввалгига қараганда касаллар сони икки бараварга ўсди. 18 июнь куни 85 кишида коронавирус аниқланганди. 179 та янги ҳолат аниқланиши — бу бир кунда Ўзбекистонда энг кўп касаллик қайд этилиши бўйича бешинчи натижа. Янги ҳолатлардан сўнг Ўзбекистонда коронавирусга чалинганлар сони 5946 нафарга етди.

Фото: Telegram / @ssvmatbuotkotibi

Янги касалланиш ҳолатлари

Янги касалланганларнинг

  • 146 нафари карантин муассасаларидаги фуқаролар орасида;
  • 29 нафари аҳоли орасида (Тошкент шаҳрида — 24 нафар, Наманган вилоятида — 3 нафар, Тошкент вилоятида — 2 нафар);
  • 4 нафари халқаро юк ташувчи автомашина ҳайдовчилари орасида (Тошкент вилоятида — 2 нафар, Хоразм вилоятида — 1 нафар, Андижон вилоятида — 1 нафар) аниқланган.

Кун давомида 6 та ҳудудда янги касалланганлар қайд этилди. Ушбу ҳудудларнинг 3 тасида аҳоли орасида коронавирус аниқланди.

Аҳоли орасида қайд этилган 29 та ҳолатдан 24 таси Тошкент шаҳрида қайд этилди. Соғлиқни сақлаш вазирлиги Тошкентда қайд этилган 8 та ҳолат бўйича маълумот бердиЮнусобод туманида яшовчи такси ҳайдовчисида (ўзи келиб намуна топширган), тана ҳарорати кўтарилгач, шифокорга мурожаат қилган Олмазор туманида яшовчи уй бекасида, Учтепа туманида яшаб, Сергели туманида озиқ-овқат дўконида ишловчи сотувчида, худди шу тумандаги туғруқ таътилида бўлган уй бекасининг ( 2020 йилнинг 13 июнидан тана ҳарорати кўтарила бошлаган) ўғли ва қизида ҳамда яна Учтепа туманидаги якка тартибдаги тадбиркорда (ўзи бориб таҳлил топширган), Шайхонтоҳур туманида яшовчи фуқарода (12 июндан тана ҳарорати кўтарила бошлаган) ҳам коронавирус инфекцияси тасдиқланган. Мазкур касаллик аниқланган фуқароларнинг аксарияти тана ҳарорати кўтарилгач, шифохонага мурожаат қилган ва намуна топширган.

Шунингдек, Тошкент шаҳрида коронавирус аниқланган фуқаро туғилган кун муносабати билан ўтказган тадбирида иштирок этган 13 нафар оила аъзоси ва қариндошига касалликни юқтиргани маълум бўлди. Аввалроқ Самарқандда аза маросими чоғида коронавирус юқиши қайд этилгани маълум бўлганди.

Наманган вилоятида 16 июндан бери энди янги касалланиш ҳолатлари қайд этилди. Янги ҳолатларнинг 3 таси аҳоли орасида, 4 таси касалликка чалинганлар билан мулоқотда бўлганлар орасида аниқланди.

Бир кун аввал аҳоли орасида энг кўп касалланиш ҳолати қайд этилган (14 та) Тошкент вилоятида 19 июнь куни аҳоли орасида 2 та янги ҳолат аниқланди.

Хоразм вилоятида 15 июндан бери энди янги касалланиш ҳолатлари қайд этилди. Вилоятда аниқланган 12 та ҳолатдан 11 таси коронавирусга чалинганлар билан мулоқотда бўлиб, карантинга олинганлар орасида, 1 таси халқаро юк ташувчи автомашина ҳайдовчисида аниқланди.

Навоий вилоятида ҳам карантинга олинган фуқаролар орасида 4 та янги ҳолат қайд этилди.

Андижон вилоятида беш кун ичида биринчи марта янги касалланиш ҳолати аниқланди. Халқаро юк ташувчи машина ҳайдовчисида вирус аниқланган.

Касалликдан даволаниш

19 июнь куни коронавирусдан соғайган 74 нафар фуқаро уйларига кузатилди. Уларнинг 68 нафари Тошкент шаҳридаги, 6 нафари Самарқанд вилоятидаги тиббиёт муассасаларида шифо топди.

Ҳозирда касаллик қайд этилган жами 5946 нафар бемордан 4273 нафари соғайиб, даволаниш кўрсаткичи 72 фоизни ташкил этмоқда. 13 июнь куни бу борадаги кўрсаткич 78 фоизгача ҳам чиққанди.

17 июнь куни шифохоналардаги беморлар сони биринчи марта 1500 нафардан ошганди, 19 июнга келиб уларнинг сони 1600 нафардан ҳам ошди. Айни вақтда шифохоналардаги 1654 нафар бемордан 1295 нафари Тошкентдаги тиббиёт муассасаларида даволанмоқда (Сирдарё вилоятидаги беморлар ҳам Тошкент шаҳрига ўтказилган). Қолган 359 нафар бемор мамлакатнинг 9 ҳудудидаги шифохоналарда даволанмоқда.

Қорақалпоғистонда 6, Андижонда 8, Сурхондарёда 15, Самарқандда 17, Бухорода 27, Наманганда 28, Хоразмда 36, Навоийда 61 ва Қашқадарёда 161 нафар бемор қолди. Жиззах ва Фарғона вилоятлари коронавирусдан холи ҳудуд бўлиб турибди.

Аҳволи оғир беморлар

Айни пайтда тиббиёт муассасаларида даволанаётган 1654 нафар бемордан 14 нафари оғир, 1 нафари эса ўта оғир аҳволда. Икки суткадан бери аҳволи оғир беморлар сони 12 нафарни ташкил этаётганди. 16 июндан бери шифохоналарда аҳволи ўта оғир беморлар қолмаганди. Энди бир нафар ўта оғир аҳволдаги бемор бор.

15 мартда эпидемия бошланганидан бери Ўзбекистонда 19 нафар бемор COVID-19 асоратлари оқибатида вафот этган. Июнь ойининг ўзида 4 нафар бемор ҳаётдан кўз юмди.

Карантиндагилар

Ҳозирда Ўзбекистонда уй карантинида 33 601 нафар, стационар карантинда эса 22 875 нафар фуқаро тиббий кузатувда бўлиб турибди. Бир кун ичида уй карантинидаги фуқаролар сони 3167 нафарга, стационар карантиндаги фуқаролар сони 532 нафарга кўпайди. Уй карантинидаги фуқаролар сони бир кунда 3 мингдан ортиққа кўпайиши яқин орада кузатилмаганди.