O‘zbekistonda 16-iyun soat 23:00 dan 17-iyun soat 23:00 ga qadar 189 kishida koronavirus aniqlandi. Bu bir kunda eng ko‘p kasallik aniqlanishi bo‘yicha uchinchi natija. 7-iyunda 237 kishida, 16-iyunda 230 kishida koronavirus aniqlangandi. Yangi holatlardan so‘ng O‘zbekistonda koronavirusga chalinganlar soni 5682 nafarga yetdi.
Yangi kasallanish holatlari
Yangi kasallanganlarning- 169 nafari karantin muassasalarida
- 13 nafari aholi orasida (Toshkent shahrida — 5 nafar, Buxoro viloyatida — 3 nafar, Toshkent viloyatida — 3 nafar, Surxondaryo viloyatida — 2 nafar)
- 7 nafari xalqaro yuk tashuvchi avtomashina haydovchilari orasida (ularning barchasi Toshkent viloyatida) aniqlangan.
Aholi orasida eng ko‘p kasallanish holati yana Toshkent shahrida qayd etildi. Poytaxtda besh kishida koronavirus aniqlangan. 17-iyun kuni Vazirlar Mahkamasidagi departament mudirlaridan birida koronavirus aniqlangani ma’lum bo‘lgandi. Hozirda hukumat binosi qat’iy karantinga olingan.
Toshkent shahrida koronavirus infeksiyasi bilan kasallanganlar soni oshgani sabab 17-iyun kuni “Malika” savdo markazi, Yunusobod dehqon bozori va Uchtepa tumanidagi “O‘rikzor” savdo kompleksi faoliyati to‘xtatildi. Bir kun avval “Malika” savdo markazi sotuvchisida koronavirus aniqlangandi. Shahardagi 71 ta mahalla “qizil” hudud sifatida belgilandi (ularning ro‘yxati bilan ushbu havolada tanishib olishingiz mumkin). Bir hafta avval Toshkentdagi 42 ta mahalla “qizil” edi.
Buxoro viloyatida 8 ta yangi holat qayd etilgan bo‘lib, ularning 3 tasi aholi orasida aniqlandi. Bungacha Buxoroda 10-iyun, 12-iyun, 14-iyun va 16-iyunda ham aholi orasida koronavirus aniqlangandi.
Surxondaryo viloyatida 6 ta yangi holat qayd etilib, ulardan 2 tasi aholi orasida aniqlandi. Surxondaryoga 14-iyun kuni koronavirus qaytgandi. Viloyatdagi tashkilotlardan birining xodimi Toshkent shahrida xizmat safaridan qaytgach hamkasblariga kasallikni yuqtirgani ma’lum bo‘lgandi. U bemor bilan muloqotda bo‘lgan 300 dan ortiq odam karantinga olingandi. Bundan tashqari, 16-iyundan boshlab Termiz shahriga kirib-chiqish vaqtincha to‘xtatilgani to‘g‘risida xabar berilgandi. Muzrabot tumanidagi to‘yda belgilangan karantin qoidalariga rioya qilinmagani oqibatida 250 nafardan ortiq fuqaro karantinga olingan.
Toshkent viloyatida xalqaro yuk mashinasi haydovchilari orasida 7 ta, aholi orasida 3 ta holat qayd etildi.
Samarqand viloyatida qayd etilgan 5 ta holatning bari koronavirusga chalinganlar bilan muloqotda bo‘lib, karantinga olingan fuqarolar orasida aniqlangan. Avvalroq Samarqand tumanida aza marosimi chog‘ida koronavirus yuqishi qayd etilgani ma’lum bo‘lgandi.
Kasallikdan davolanish
17-iyun kuni 35 nafar fuqaro koronavirusdan sog‘aydi. Shundan 31 nafari Toshkent shahridagi, 4 nafari Samarqand viloyatidagi tibbiyot muassasalarida shifo topdi.Hozirda kasallik qayd etilgan jami 5682 nafar bemordan 4131 nafari sog‘ayib, davolanish ko‘rsatkichi 72 foizni tashkil etmoqda. 13-iyun kuni bu boradagi ko‘rsatkich 78 foizgacha ham chiqqandi. Ammo so‘nggi kunlarda yangi kasallanganlar soni sog‘ayganlar sonidan bir necha barobar ko‘p bo‘lmoqda. Misol uchun, 15-iyun kuni yangi kasallanganlar sog‘ayganlardan deyarli 2,5 barobar, 16-iyun kuni 3 barobar, 17-iyunda esa deyarli 5,5 barobar ko‘p bo‘ldi.
Koronavirusdan davolanayotgan bemorlar soni O‘zbekistonda birinchi marta 1500 nafardan oshib ketdi. Ayni vaqtda shifoxonalardagi 1532 nafar bemordan 1203 nafari Toshkentdagi tibbiyot muassasalarida davolanmoqda (Sirdaryo viloyatidagi bemorlar ham Toshkent shahriga o‘tkazilgan). Qolgan 329 nafar bemor mamlakatning 9 hududidagi shifoxonalarda davolanmoqda.
Qoraqalpog‘istonda 6, Andijonda 7, Surxondaryoda 15, Namanganda 21, Samarqandda 23, Xorazmda 24, Buxoroda 27, Navoiyda 51 va Qashqadaryoda 155 nafar bemor qoldi. Jizzax va Farg‘ona viloyatlari koronavirusdan xoli hudud bo‘lib turibdi.
Ahvoli og‘ir bemorlar
Ayni paytda tibbiyot muassasalarida davolanayotgan 1532 nafar bemordan 12 nafari og‘ir ahvolda. Bir sutka avval ahvoli og‘ir bemorlar soni 13 nafarni tashkil etayotgandi.15-martda epidemiya boshlanganidan beri O‘zbekistonda 19 nafar bemor COVID-19 asoratlari oqibatida vafot etgan. Iyun oyining o‘zida 4 nafar bemor vafot etdi.