Sog‘liqni saqlash vazirligining xabar berishicha, 19-iyun soat 10:00 qadar kasallik aniqlangan 88 nafar bemordan 10 nafari Toshkent shahrida aholi orasida qayd etilgan.
Foto: “Daryo”
Jumladan, Yunusobod tumanida yashovchi taksi haydovchisida (o‘zi kelib namuna topshirgan), tana harorati ko‘tarilgach shifokorga murojaat qilgan Olmazor tumanida yashovchi uy bekasida, Uchtepa tumanida yashab, Sergeli tumanida oziq-ovqat do‘konida ishlovchi sotuvchida, xuddi shu tumandagi tug‘ruq ta’tilida bo‘lgan uy bekasining ( 2020-yilning 13-iyunidan tana harorati ko‘tarila boshlagan) o‘g‘li va qizida hamda yana Uchtepa tumanidagi yakka tartibdagi tadbirkorda (o‘zi borib tahlil topshirgan), Shayxontohur tumanida yashovchi fuqaroda (12-iyundan tana harorati ko‘tarila boshlagan) ham koronavirus infeksiyasi tasdiqlangan. Mazkur kasallik aniqlangan fuqarolarning aksariyati tana harorati ko‘tarilgach, shifoxonaga murojaat qilgan va namuna topshirgan.
Qayd etilishicha, ayni paytda ushbu holatlar yuzasidan epidemiologik surishtiruv ishlari olib borilmoqda.
Bundan tashqari, koronavirus aniqlangan poytaxtda yashovchi fuqaroning tug‘ilgan kun munosabati bilan o‘tkazgan tadbirida ishtirok etgan 13 nafar oila a’zosi va qarindoshiga kasallikni yuqtirgan.
Eslatib o‘tamiz, 17-iyunda O‘zbekistonda koronavirus infeksiyasi tasdiqlangan 189 nafar bemorning 13 nafari aholi orasida aniqlangan bo‘lsa, 18-iyun kuni 85 nafar bemordan 28 nafari aholi orasida tasdiqlandi. Ikki kunlik ma’lumotga ko‘ra, umumiy kasallanish ko‘rsatkichi pasaygan bo‘lsa-da, aholi orasida koronavirusga chalinish holati keskin oshganini ko‘rish mumkin.
“Shu bois yaqin kunlarda turli marosim va tadbirlar o‘tkazishdan vaqtinchalik tiyilib turishimiz, imkon qadar odamlarni to‘plamaslikka, aholi gavjum joylardan uzoqroq bo‘lishimiz o‘zimiz va yaqinlarimizning salomatligi uchun eng muhim qoida ekanligini unutmasligimiz kerak. Shu o‘rinda hozir birgina ana shu voqea sabab qancha kishi uy va statsoinar karantinga olinganligini aytishning hojati ham bo‘lmasa kerak”, — deyiladi vazirlik xabarida.
Xavotirli vaziyatdan kelib chiqqan holda SSV yana bir bor aholini, jumladan, faoliyati tiklangan sohalarda mehnat qilayotgan fuqarolarni xushyorlikni yo‘qotmagan holda karantin qoidalariga qat’iy rioya etishlarini so‘radi.
Ma’lumot uchun, 19-iyun soat 17:00 holatiga ko‘ra, O‘zbekistonda koronavirus infeksiyasi qayd etilganlar soni 5920 nafarga yetdi. Shulardan 4273 nafari kasallikdan sog‘aygan bo‘lsa, 19 nafari kasallik asoratlaridan vafot etgan.
