O‘zbekistonda 17-iyun soat 23:00 dan 18-iyun soat 23:00 ga qadar koronavirusga chalinish bilan bog‘liq 85 ta holat qayd etildi. So‘nggi besh kun ichida birinchi marta yangi kasallanish holatlari 100 tadan oshmadi. 17-iyunda 189, 16-iyunda 230, 15-iyunda 183 va 14-iyunda 114 kishida koronavirus aniqlangandi. Yangi holatlardan so‘ng O‘zbekistonda koronavirusga chalinganlar soni 5767 nafarga yetdi.

Foto: Telegram / @ssvmatbuotkotibi

Yangi kasallanish holatlari

Yangi kasallanganlardan

  • 54 nafari Karantin muassasalaridagi fuqarolar orasida;
  • 28 nafari aholi orasida (Toshkent viloyatida — 14 nafar, Toshkent shahrida — 13 nafar, Qashqadaryo viloyatida — 1 nafar);
  • 3 nafari xalqaro yuk tashuvchi avtomashina haydovchilari orasida (Toshkent viloyatida — 2 nafar, Sirdaryo viloyatida — 1 nafar) aniqlangan.

Kun davomida beshta hududda kasallik aniqlandi. 18-iyunda yangi kasallanish holatlari qayd etilgan Toshkent shahri, Toshkent, Navoiy va Qashqadaryo viloyatlarini Prezident Shavkat Mirziyoyev ikki kun avval vaziyat murakkab bo‘lib turgan hududlar sifatida e’tirof etgandi.

Kasallikdan davolanish

18-iyun kuni 68 nafar fuqaro koronavirusdan sog‘aydi. Ularning barchasi Toshkent shahridagi tibbiyot muassasalarida shifo topdi. Poytaxtda koronavirusdan davolanganlar soni 2100 nafardan oshib ketdi. Shu vaqtgacha kasallikdan sog‘ayganlarning yarmidan ko‘pi aynan Toshkentda davolangan.

Hozirda kasallik qayd etilgan jami 5767 nafar bemordan 4199 nafari sog‘ayib, davolanish ko‘rsatkichi 72 foizni tashkil etmoqda. 13-iyun kuni bu boradagi ko‘rsatkich 78 foizgacha ham chiqqandi.

Ayni vaqtda shifoxonalardagi 1549 nafar bemordan 1208 nafari Toshkentdagi tibbiyot muassasalarida davolanmoqda (Sirdaryo viloyatidagi bemorlar ham Toshkent shahriga o‘tkazilgan). Qolgan 341 nafar bemor mamlakatning 9 hududidagi shifoxonalarda davolanmoqda.

Qoraqalpog‘istonda 6, Andijonda 7, Surxondaryoda 15, Namanganda 21, Samarqandda 23, Xorazmda 24, Buxoroda 27, Navoiyda 57 va Qashqadaryoda 161 nafar bemor qoldi. Jizzax va Farg‘ona viloyatlari koronavirusdan xoli hudud bo‘lib turibdi.

Ahvoli og‘ir bemorlar

Ayni paytda tibbiyot muassasalarida davolanayotgan 1549 nafar bemordan 12 nafari og‘ir ahvolda. Bir sutka ichida ahvoli og‘ir bemorlar sonida o‘zgarish bo‘lmadi.

15-martda epidemiya boshlanganidan beri O‘zbekistonda 19 nafar bemor COVID-19 asoratlari oqibatida vafot etgan. Iyun oyining o‘zida 4 nafar bemor vafot etdi.

Karantindagilar

Hozirda O‘zbekistonda uy karantinida 30 434 nafar, statsionar karantinda esa 22 343 nafar fuqaro tibbiy kuzatuvda bo‘lib turibdi. Bir kun ichida uy karantinidagi fuqarolar soni 1798 nafarga, statsionar karantindagi fuqarolar soni 288 nafarga ko‘paydi.