O‘zbekiston shifoxonalaridagi koronavirusga chalingan bemorlar soni birinchi marta 1500 nafardan oshib ketdi

O‘zbekistonda koronavirusga chalinish holatlari kundan kunga ortib borishi ortidan shifoxonalardagi bemorlar soni birinchi marta 1500 nafardan oshib ketdi. Hozirda O‘zbekistonning 10 ta hududidagi shifoxonalarda 1532 nafar bemor koronavirusdan davolanmoqda.

O‘zbekistonda shu paytgacha bir vaqtda shifoxonada koronavirusdan davolanayotgan bemorlar soni 1500 dan oshmagandi. Aprel oyining ikkinchi yarmida shifoxonalardagi bemorlar soni 1300 nafardan ko‘p bo‘lgandi. Shundan so‘ng sog‘ayganlar soni yangi kasallanganlar sonidan ko‘payishi ortidan shifoxonadagi bemorlar soni kamaya boshladi. 28-aprel kuni bemorlar soni 1000 nafardan kamaydi, 18-mayda esa 464 nafar bemor qolgandi. Davolanish ko‘rsatkichi 82 foizga yetib, koronavirusdan xoli hududlar soni ham oshib borayotgandi.

Karantin cheklovlari yengillashtirilib, xorijdan charter reyslar soni ko‘paytirilgach, bemorlar soni ham ko‘payishni boshladi.

O‘zbekistonda 17-iyun soat 23:00 holatiga ko‘ra, 5682 kishida koronavirus aniqlangan bo‘lsa, ulardan 4131 nafari kasallikdan forig‘ bo‘lgan. 19 bemor esa kasallik asoratlaridan vafot etgan.

Ayni vaqtda shifoxonalardagi 1532 nafar bemordan 1203 nafari Toshkentdagi tibbiyot muassasalarida davolanmoqda (Sirdaryo viloyatidagi bemorlar ham Toshkent shahriga o‘tkazilgan). Qolgan 329 nafar bemor mamlakatning 9 hududidagi shifoxonalarda davolanmoqda.

Qoraqalpog‘istonda 6, Andijonda 7, Surxondaryoda 15, Namanganda 21, Samarqandda 23, Xorazmda 24, Buxoroda 27, Navoiyda 51 va Qashqadaryoda 155 nafar bemor qoldi. Jizzax va Farg‘ona viloyatlari esa koronavirusdan xoli hudud bo‘lib turibdi.

Oxirgi vaqtlarda O‘zbekistonda kasallik yuqtirib olish holatlari ko‘paymoqda. 7-iyundan buyon 9 marta bir kunda kasallanganlar soni 100 nafardan oshdi, shulardan 2 tasida esa 200 nafardan ham oshdi. Kasallikdan sog‘ayish holatlari esa so‘nggi kunlarda ancha past ko‘rsatkichni qayd etmoqda. Misol uchun, 15-iyun kuni yangi kasallanganlar sog‘ayganlardan deyarli 2,5 barobar (183 ga 76), 16-iyun kuni 3 barobar (230 ga 77), 17-iyunda esa deyarli 5,5 barobar (189 ga 35) ko‘p bo‘ldi.

Yangi tartibga ko‘ra, koronavirusdan davolanib chiqqan bemorlar reabilitatsiyaga emas, to‘g‘ridan to‘g‘ri uyiga jo‘natilmoqda. Reabilitatsiyaga kuzatilganlar orasida virusning qaytalanishi bilan bog‘liq holatlar kuzatilmagach, bu tajribadan voz kechildi. Reabilitatsiyadagi bemorlarning har biri uchun 2,8 million so‘mdan pul sarflanayotgandi. 23-may holatiga ko‘ra, reabilitatsiyaga o‘tkazilgan 2492 nafar bemor uchun 6 milliard 977 million so‘m sarflangani ma’lum qilingandi.

O‘zbekiston bemorlarni davolashda yana bir yangi amaliyotga o‘tish arafasida. Prezident Shavkat Mirziyoyev 16-iyundagi videoselektorda “Virusning yengil shakllari aniqlangan yoki kasallik alomatlarsiz o‘tayotgan fuqarolarni uy sharoitida tibbiy nazoratda ushlash va davolash amaliyotini yo‘lga qo‘yishimiz kerak”, deb aytib o‘tdi.

SSV matbuot kotibi Furqat Sanayev hatto dunyoning rivojlangan davlatlarida ham koronavirusga chalinganlar faqat og‘ir holatlardagina shifoxonaga yotqizilishi, qolgan payt kerakli dori-darmonlar tavsiya qilinib, uyda davolanish buyurilishini qayd etdi.

O‘zbekiston bosh davlat sanitariya inspektori Nurmat Otabekov 1-iyundagi brifingda koronavirus infeksiyasi 80 foiz holatda yengil, 15 foiz holatda o‘rta og‘irlikda va faqat 3-5 foiz holatda og‘ir, ya’ni nafas yetishmovchiligi bilan kechishini aytib o‘tgandi.

Hozirgi kunda shifoxonalarda koronavirusdan davolangan har bir bemor uchun 32,3 million so‘mdan pul sarflanmoqda. 23-mayda e’lon qilingan hisobotda koronavirusga chalingan bemorlar davolanib chiqishi uchun 109 milliard so‘mdan ortiq pul sarflangani ma’lum bo‘lgandi.