Юқори натижа кўрсатган умумтаълим мактаблари директорлари ва уларнинг ўринбосарлари билан тузилган меҳнат шартномаларини бекор қилиш Халқ таълими вазирлиги билан келишилган ҳолда амалга оширилади, деб хабар бермоқда ХТВ матбуот хизмати.
Бу ҳақда халқ таълими вазирининг «Умумтаълим мактабларининг ўрнак кўрсатган раҳбар ходимларини янада қўллаб-қувватлаш чора-тадбирлари тўғрисида»ги буйруғида қайд этилган.
Буйруқ билан умумтаълим мактабларида таълим сифати ва самарадорлигини ошириш бўйича юқори натижаларга эришган, битирувчиларнинг камида 50 фоизи олий таълим муассасаларига ўқишга кирган умумтаълим мактаблари директори, директорнинг ўқув ишлари ва ихтисослашган фанлар бўйича ўринбосарларининг дахлсизлигини таъминлаш ва фаолиятини қўллаб-қувватлаш мақсадида тегишли чоралар белгиланди.
Жумладан, юқори натижаларга эришган мактабларнинг директорлари билан тузилган меҳнат шартномаларини бекор қилиш Халқ таълими вазирлиги билан келишилиб, мактаб директорининг ўқув ишлари ва ихтисослашган фанлар бўйича ўринбосарлари билан тузилган меҳнат шартномаларини бекор қилиш ҳудудий бошқармалари томонидан белгиланган тартибда амалга оширилади (Меҳнат кодексининг 106-моддасига асосан, меҳнат шартномасининг бекор қилиниши бундан мустасно).
Бундан ташқари, умумтаълим мактаблари раҳбар ходимлари вазирликнинг тегишли тармоқ мукофотлари билан тақдирланади ҳамда уларнинг номзоди келгусида юқори раҳбарлик лавозимларига захирага олинади.
Эслатиб ўтамиз, Халқ таълими вазирлигида 2019 йилнинг октябрь ойида бўлиб ўтган навбатдаги кенгайтирилган Ҳайъат йиғилишида ўқувчилари ОТМларга киришда ёмон натижа кўрсатадиган мактаб раҳбарлари жазоланиши айтилган эди.
Изоҳ (0)