Ўзбекистонда абитуриентларнинг қабул ва имтиҳонлар бўйича саволларига жавоб берадиган Call-марказ ташкил этилди

Ўзбекистонда янги ўқув йили учун олий таълим муассасаларига қабул жараёни бошланиши муносабати билан абитуриентлар ва уларнинг ота-оналари саволларига жавоб берадиган Call-марказ ташкил этилди. Бу ҳақда Олий ва ўрта махсус таълим вазирлиги маълум қилди.

Хабар берилишича, 2020/2021-ўқув йили учун олий таълим муассасаларига қабул жараёни бошланиши муносабати билан Олий ва ўрта махсус таълим вазирлигида Call-марказ ташкил этилди. Мазкур Call-марказ абитуриентлар ва уларнинг ота-оналарини кириш имтиҳонлари ва қабул бўйича қизиқтирган саволларга тезкор жавоб бериш мақсадида ташкил этилган.

Қайд этилишича, фуқаролар +99871 246 38 57 телефон рақами орқали Call-марказ билан боғланиб, саволларига жавоб олиши мумкин. Call-марказ душанбадан шанбагача ҳар куни соат 09:00 дан 17:00 га қадар фаолият кўрсатади (тушлик соат 13:00 дан 14:00 гача).

Вазирликнинг қўшимча қилишича, республикадаги барча ОТМларда ҳам қабул жараёнида Call-марказлар ишлайди ва улар ҳақида алоҳида маълумот берилади.

Эслатиб ўтамиз, Ўзбекистон ОТМларига 2020/2021-ўқув йили учун тасдиқланган қабул квоталарига кўра, бакалавриатнинг кундузги таълим шаклига 103 575 нафар, сиртқи таълим шаклига 31 350 нафар, кечки таълим шаклига эса 5025 нафар талаба қабул қилинади. Магистратура босқичига эса 10 425 квота берилган. Шунингдек, ОТМларига кириш учун 2020 йилда 7 тоифадаги 8694 нафар абитуриентга имтиёзли давлат гранти ажратилади. Хотин-қизларнинг ОТМга киришида қўшимча тўрт фоизли давлат гранти асосида квота ажратилади.

Бакалавриат учун абитуриентлардан ҳужжатлар 20 июндан 20 июлгача (20 июль куни ҳам) ДТМ сайти ва Ягона интерактив давлат хизматлари портали орқали қабул қилинади. Бакалавриат учун кириш имтиҳонлари фақат иккита мутахассислик фанидан ўтказилади. Кириш имтиҳонларини 1 августдан бошлаш режалаштирилмоқда.