Қозоғистон ҳукумати ҳузуридаги Идоралараро комиссия томонидан коронавируснинг Қозоғистон ҳудудида тарқалишининг олдини олиш мақсадида бир қатор қўшимча муҳофаза чоралари кўрилди. Бу ҳақда Tengrinews хабар бермоқда.
Жумладан, 29 январдан бошлаб Қозоғистон ва Хитой ўртасида автобус қатновлари, 1 февралдан йўловчи поездлари қатновлари, 3 февралдан эса мунтазам авиақатновлар тўхтатилади. Шунингдек, Хитой фуқароларига виза бериш ҳам тўхтатилган.
«Идоралараро комиссия томонидан вазият кеча-ю кундуз кузатиб борилмоқда. 29 январь ҳолатига кўра Қозоғистон ҳудудида коронавирус инфекцияси билан касалланиш ҳолатлари қайд этилмаган. Ушбу масала давлат раҳбариятининг алоҳида назорати остида турибди», — дейилади расмий хабарда.
Қайд этиш жоиз, 2019-nCoV коронавирусининг ўчоғи Хитойнинг Ухань шаҳрида жойлашган. Хитойда ушбу зотилжам касаллиги билан хасталанганлар сони қарийб 6 минг кишига етган, улардан 132 нафари вафот этган.
Хабар беришларича, гонконглик олимлар коронавирусга қарши вакцинани тайёрлаб бўлган, бироқ уни ҳайвонларда синаб кўриш учун бир неча ой вақт кетади, одамларда клиник синовлар ўтказиш учун эса яна бир йил керак бўлади.
Маълумот учун, Ўзбекистон Соғлиқни сақлаш вазирлиги Ўзбекистонга коронавирус инфекцияси кириб келмагани, шу вақтгача мамлакат ҳудудида ушбу касалликни юқтириш билан боғлиқ бирорта ҳолат қайд этилмаганини деярли ҳар куни такрорламоқда, бироқ расмийлар Хитойдан келаётганларга нисбатан алоҳида, фавқулодда муҳофаза чораларини кўряптими, Хитой билан авиақатновларни чеклаш масалаларини кўриб чиқаяптими ёки йўқ — ҳозирча номаълум (қайд этиш жоиз, Хитойдан Ўзбекистонга қайтиш истаги беш баробарга ошган). Масалан, ҳукумат раҳбари Абдулла Арипов коронавирус масаласида 28 январь куни йиғилиш ўтказгани 29 январь куни кутилмаганда — Халқаро пресс-клуб сессиясида маълум бўлди.
Изоҳ (0)