Республикада мавжуд 25 та манзилли-колонияда жазо ўтаётган маҳкумларнинг 300 нафардан зиёди пенсия ёшида бўлиб, ҳозирда уларнинг 68 нафарига пенсия пули тўланмоқда. Мазкур тартиб 2019 йил 28 августда имзоланган «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонунга асосан йўлга қўйилди. Бу ҳақда 28 январь куни АОКАда ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.
Тадбирда айтилишича, бюджетдан ташқари Пенсия жамғармасининг туман (шаҳар) бўлимлари томонидан манзилли-колонияларда жазони ўтаётган, озодликдан маҳрум этишга ҳукм қилинган 37 нафар фуқарога пенсия тайинланган. 31 нафар шахснинг эса илгари тўхтатилган пенсия тўловлари тиклаб берилган. Таҳлилларга кўра, 62 нафар фуқаро ёшга доир, 6 нафари эса ногиронлик пенсияси олмоқда. Уларнинг пенсия пуллари банкларда очилган пластик карталар ёки омонатларига ўтказилади.
«Манзилли-колониялардаги 70 нафарга яқин фуқаро озодликдан маҳрум этилгунга қадар бирор турдаги давлат пенсиясини олиб келганлиги аниқланди. Савол туғилиши мумкин: нима учун уларнинг 31 нафарини пенсия тўлови тиклаб берилди? Бунга асосий сабаб сифатида маҳкумлар пенсияларни тиклашни сўраб мурожаат қилишмаганлиги маълум бўлди. Ваҳоланки, бу борада Пенсия жамғармаси томонидан маҳкумларга тегишли тартибда мурожаат қилишлари мумкинлиги тўғрисида маълумотлар берилган. Ўтказилган сўровномалар натижасида маҳкумларнинг аксарияти талаб этиладиган минимал 7 йил иш стажига эга эмаслиги ойдинлашди.
Шу ўринда маҳкумларга давлат пенсияларини тўлаш учун маблағлар Пенсия жамғармаси молиявий кўрсаткичларига сезиларли даражада таъсир кўрсатмаслигини ҳам таъкидлаб ўтиш лозим», — деди Пенсия жамғармаси ижро этувчи аппарати бўлим бошлиғи Шуҳрат Ўтаганов.
Маълум бўлишича, тартиб ўзгарганидан сўнг мурожаатлар Қорақалпоғистон Республикаси, Жиззах, Қашқадарё, Самарқанд, Сирдарё, Сурхондарё, Тошкент вилоятларидаги манзилли-колониялардан келиб тушган.
Изоҳ (0)