Ўзбекистон соғлиқни сақлаш тизимини рақамлаштириш бўйича «Электрон соғлиқни сақлаш» лойиҳаси 600 миллион доллар атрофида баҳоланмоқда. Бу ҳақда Бош вазир Абдулла Арипов Олий Мажлис Қонунчилик палатаси йиғилишида маълум қилди, дея хабар беради «Gazeta.uz».
«Соғлиқни сақлаш тизимини рақамлаштириш — катта жараён. Бу ишни компьютер қўйиш билан ҳал қилиб бўлмайди. Маълумотлар базасини яратиш лозим, бу телетиббиёт, масофавий мулоқот орқали ташхис қўйишни англатади. Бу жуда мураккаб тизим, бир кунда уни яратиб бўлмайди. Техник-иқтисодий асосларни ҳисоблаганимизда 600 миллион доллар атрофида чиқди, лекин бу хориждан харид қилганимиздаги маълумотдир», — деди Арипов.
Бош вазирга кўра, Президент фармонига биноан Ўзбекистон 2025 йилга келиб тўлиқ тиббий суғурта тизимига ўтади. Ушбу муддатгача «Электрон соғлиқни сақлаш» лойиҳасини якунлаш кўзда тутилмоқда.
«Ҳеч бир давлат бу тизимга бир йилда ўтмаган. Унинг қиймати 600 миллион долларга етмаса керак, чунки маҳаллий дастурчилар ёрдамида амалга оширишни режалаштиряпмиз», — дейди Бош вазир.
Изоҳ (0)