Қашқадарё вилоятида 26 январь куни тахминан соат 18:50 ларда номаълум шахс Қарши шаҳар, 7-кичик тумандаги уйлар олдида турган фуқаро А.Х.га тегишли Nexia-2’нинг олд эшик ойнасини синдириш йўли билан очиб, номаълум томонга олиб қочган.
ИИВ ҳузуридаги Тергов департаментининг хабар беришича, тезкор қидирув тадбирлари натижасида уни маст ҳолатда бўлган 37 ёшли А.Ю. содир этгани аниқланган. У шу куни соат 20:00 да машинани Мустақиллик шоҳ кўчасида жойлашган «Оила маркази» биноси қаршисида ҳайдаб кетаётганида ўзидан олдиндаги Nexia-3’га урилиб, йўлнинг қарама-қарши йўналишидан келаётган Lacetti билан тўқнашган ҳолатда топилган.
Воқеа оқибатида ҳайдовчи А.Ю. турли тан жароҳатлари билан шифохонага ётқизилган.
Мазкур ҳолат юзасидан Қарши шаҳар ИИО ФМБ ҳузуридаги Тергов бўлими томонидан фуқаро А.Ю.га нисбатан Ўзбекистон Республикаси Жиноят кодексининг 267-моддаси 2-қисми «г» банди (Транспорт воситасини олиб қочиш) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Изоҳ (0)