Самарқанд вилоятининг Пахтачи туманида тошдан олтин моддаси ажратиш цехи фаолияти фош этилди. Бу ҳақда «Дарё»га Бош прокуратура матбуот хизмати хабар берди.
Маълум бўлишича, фуқаро Ж.Қ. ва бошқалар «Навоий кон-металлургия комбинати» давлат корхонасига қарашли «Қорақўтон» тоғ тизмасидаги махсус ҳудуддан яширин равишда таркибида қимматбаҳо олтин моддаси бўлган тош хом ашёсини ўғрилик йўли билан кавлаб олиб, «И.Э.» МЧЖга қарашли иссиқхонада яширин цех ташкил қилиб, тош маҳсулотларини қайта ишлаш орқали олтин моддасини ажратиб олиш фаолияти билан шуғулланиб келган.
Департаментнинг Пахтачи туман бўлими ҳамда туман прокуратураси ходимлари томонидан ҳамкорликда ўтказилган тезкор тадбирда улардан 445 килограмм тоғ тошлари, 666 килограмм қум ҳамда тоғ жинсларини бўлаклаш ва майдалашга мўлжалланган қўлбола усулда ясалган тегирмон ва бошқа жиҳозлар ашёвий далил сифатида олинган.
«Навоий кон-металлургия комбинати» давлат корхонасининг кимёвий экспертизаси хулосасига кўра, ашёвий далил сифатида олинган қум ва тошларнинг таркибида маълум миқдорда олтин моддаси мавжудлиги аниқланиб, уларнинг умумий қиймати 12,2 миллион сўмни ташкил этган.
Мазкур ҳолат юзасидан Ж.Қ. ва бошқаларга нисбатан Жиноят кодексининг тегишли моддаси билан жиноят иши қўзғатилиб, тергов ҳаракатлари ўтказилмоқда.
Изоҳ (0)