Халқаро пресс клубнинг бугун, 29 январь куни ўтказилган сессиясида Соғлиқни сақлаш вазирлиги раҳбар ходимлари Хитойда тарқалган коронавирус инфекцияси ва унинг Ўзбекистонга таъсири ҳақида маълумот берди. Бу ҳақда «Дарё» мухбири Мусулмонбек Иброҳимов хабар берди.

Соғлиқни сақлаш вазирининг биринчи ўринбосари Баҳодир Юсупалиев коронавируснинг Ўзбекистонга кириб келишининг олдини олиш бўйича қилинаётган ишлар хусусида маълумот берди.

Вируслар думалоқ кўринишда бўлади. Коронавирусини микроскопда кўрганда, унинг атрофида тожга ўхшаган ўсмалар бор. Шунинг учун у «корона» номини олган.

Ушбу вирус Хитой давлатидан тарқалмоқда. Денгиз ҳайвонлари ва бошқа ҳайвон турларидан юққан бўлиши каби сабаблари кўриб чиқиляпти. Лекин Жаҳон соғлиқни сақлаш ташкилотининг айнан нимадан юққани бўйича аниқ маълумот берилмаган. Ижтимоий тармоқларда илон, кўршапалакдан юққан деган хабарлар илмий тасдиғини топмаган. Чунки бу бўйича илмий изланишлар олиб борилмоқда. Нимадан юққани бўйича ҳали аниқ бир қарорга келинмаган.

Жаҳон соғлиқни сақлаш маълумотига кўра, бугунги кунда 4593 та ҳолатда коронавирус ташхиси қўйилган. Шу билан бирга 7 мингта ҳолатда вирус юққан бўлиши тахмин қилинмоқда. Ушбу вирусдан 130 та ҳолат ўлим билан якунига етган.

Битта нарсани бишимиз керак, коронавирус дегани ҳаво томчи билан юқадиган инфекция. Ёки йўталганда, аксирганда одамдан-одамга ўтиши мумкин бўлган инфекция. Грипп билан таққослаганда гриппга ўхшаган инфекция. Гриппда ҳам 2—4 фоиз ўлим ҳолатлари кузатилади. Коронавирусига чалинганларни ўлим ҳолати ҳам 2—4 фоизни ташкил қилмоқда. Аҳолимиз ҳам шуни тушуниб олишлари керакки, бу касаллик билан курашишимиз мумкин.

Шунингдек, гигиена қоидаларини билиш ва унга риоя қилиш лозим. Яъни агар шамоллаган бўлса ниқоб тақиб, ўша одамни алоҳида парваришга ўтказиш керак. Ундай беморларга симтоматик тавсиялар берилиб, тегишли дорилар билан даволанади. Бу даволанадиган касаллик.

Бугунгача Ўзбекистонда битта ҳам ҳолат бўлмаган. Лекин бу дегани бизга кириб келмайди, дегани эмас. Шунинг учун кеча бош вазир томонидан комиссия йиғилиши ўтказилди. Йиғилишда Ташқи ишлар вазирлиги, Соғлиқни сақлаш вазирлиги, чегара қўшинлари ушбу касалликнинг олдини олишга қаратилган топшириқлар берилди. Биринчи навбатда чегаралардаги карантин-назорати пунктларини ҳар бирини назоратга олдик, инфекцияга қарши ходимларимиз у ерда фаолият олиб бормоқда. Пунктлар тепловизор ускунаси билан ишланмоқда, ушбу ускуна орқали чегарадан ўтаётган шахсларнинг тана ҳарорати кўтарилганини ёки кўтарилмаганлигини аниқлаш мумкин. Шунга қараб биринчи чора тадбирларини амалга оширамиз. Шу билан бирга ҳар битта тиббиёт муассасаларида захира ўринлари ва дори-дармонлар ҳозирлаб қўйилган.

Ўйлайманки, биринчи навбатда ҳамма ўз-ўзини ҳимоя қилиши керак. Шу жумладан тиббиёт ходимлари тегишли чораларни кўриб боради.

Баҳодир Юсупалиев, Соғлиқни сақлаш вазирининг биринчи ўринбосари 

Аввалроқ Соғлиқни сақлаш вазирлиги коронавируснинг Ўзбекистонга кириб келгани ҳақидаги гап-сўзларни инкор этган эди. Ҳозирда Хитойда коронавирус билан касалланганлар сони 6 мингдан ошиб кетди. Бунинг ортидан Хитой—Ўзбекистон авиарейсига бўлган талаб беш бараварга ортди.

Гонконгда коронавирусга қарши вакцина яратилгани маълум қилинди.