Buyuk Britaniya 12 ta atom suvosti kemasini quradi

Buyuk Britaniya 2030-yilgacha 12 tagacha yangi hujumchi suvosti kemalari qurishni rejalashtirmoqda. Bu haqda BBC xabar berdi.

Mamlakat bosh vaziri Kir Starmer 2-iyun kuni hukumat mudofaa sohasidagi yirik rejani e’lon qilishi kutilmoqda. Unda Buyuk Britaniya duch kelayotgan va o‘sib borayotgan tahdidlarni to‘xtatish uchun jangovar tayyorgarlikni kuchaytirish masalalari ko‘rib chiqiladi.

Vazirning aytishicha, 2030-yillarning oxiridan boshlab Buyuk Britaniyaning hozirgi floti o‘rnini 12 tagacha an’anaviy qurollangan yadroviy suvosti kemalari egallaydi. U, shuningdek, Buyuk Britaniya yadroviy kallaklar dasturiga 15 milliard funt sterling sarflashini tasdiqlashi kutilmoqda.

Starmerning ta’kidlashicha, yangi kemalar Britaniya va NATOni o‘nlab yillar davomida himoya qiladi. Bosh vazir yangi bayonotida qurolli kuchlarga ham aloqador 62 ta masala ko‘rib chiqilishi kutilmoqda. Jumladan:

• “Hamisha tayyor” o‘q-dorilar ishlab chiqarish quvvatini ta’minlash maqsadida oltita yangi zavod qurish uchun 1,5 milliard funt sterling ajratish;
• 7000 tagacha uzoq masofali qurollarga, shu jumladan, raketa yoki dronlarga ega bo‘lish;
• harbiylarning kibermakondagi mudofaa va hujum qobiliyatini oshirish uchun “kiber va elektromagnit qo‘mondonlik”ni o‘rnatish;
• 2029-yilgacha harbiy uy-joylarni ta’mirlashni moliyalashtirish uchun qo‘shimcha 1,5 milliard funt sterling ajratish;
• askarlarga maqsadli ma’lumotlarni yetkazishni tezlashtiruvchi texnologiya uchun 1 milliard funt sterling ajratish.

“Mudofaa vaziri Jon Xili keyingi umumiy saylovlar oldidan armiyaning umumiy sonini oshirishni maqsad qilmaganini ma’lum qilgan. Yangi suvosti kemalarini qurish 2030-yillarda 30 ming ish o‘rni, shuningdek, keyingi 10 yil ichida 30 ming shogirdlik va 14 ming bitiruvchi rolini qo‘llab-quvvatlaydi”, dedi Mudofaa vazirligi.

Starmer hukumatni 2027-yilga kelib Buyuk Britaniya milliy daromadining 2,5 foizini mudofaaga sarflashini rejalashtirgan.

“Dengizchilarimiz bizni va ittifoqchilarimizni xavfsiz saqlash uchun kun-u tun patrullik qiladi. Ammo tahdidlar kuchayib bormoqda. Shu sababli Rossiya tajovuziga qarshi turish uchun qat’iy harakat qilishimiz kerak”, dedi hukumat vakili.