2022-yilda Panamadan 250 mingga yaqin muhojir AQSHga borish maqsadida Daryen yorig‘ining “o‘lim junglisi”ni kesib o‘tdi. Biroq, bu yil ularning soni 400 ming kishiga yetishi mumkin, dedi Panama tashqi ishlar vaziri Janian Tevani. Bu haqda Financial Times nashri xabar bermoqda.
Nashr Daryen yorig‘i orqali o‘tadigan yo‘l botqoqliklar, zaharli ilonlar va u yerga o‘rnashgan mahalliy to‘dalar tufayli juda xavfli ekanini eslatdi. Panama rasmiylariga ko‘ra, 2022-yilda Lotin Amerikasi, Xitoy, Afg‘oniston va boshqa mamlakatlardan kelgan jami 248 284 muhojir ushbu hududni kesib o‘tgan.
“Biz bu yil mintaqadan 400 ming kishi o‘tishini kutmoqdamiz”, — dedi Tevani.
Uning so‘zlariga ko‘ra, ushbu yo‘ldan foydalanganlarning ko‘pchiligi jinoiy to‘dalar tomonidan Kolumbiya chegarasiga yetkazilgan. Vazirning ta’kidlashicha, odamlar jungli bo‘ylab yurishda xavfsizlik qoidalariga atay noto‘g‘ri yondashadi, buning oqibatida ko‘pchilik halok bo‘ladi.
FT taʼkidlaganidek, birgina 2022-yilning yanvaridan oktabrigacha AQSHning janubiy chegarasida qariyb 2,4 million migrant hibsga olingan. Vashington bu oqimni “Amerika duch kelgan eng katta migrantlar inqirozi” deb atagan.
Rasmiy Panama ma’lumotlariga ko‘ra, 2023-yilda Daryen yorig‘i yo‘nalishidan foydalanayotgan muhojirlarning uchdan bir qismidan ko‘prog‘i Gaitidan kelgan. Xitoydan kelgan muhojirlar soni ham ko‘paydi — joriy yilning dastlabki ikki oyida 2 200 ga yaqin xitoylik xavfli jungli orqali Panamaga o‘tdi, bu o‘tgan yildagidan ko‘proq.
Panama — Markaziy Amerikadagi davlat, Karib dengizi va Tinch okeani oralig‘idagi Panama bo‘ynida joylashgan. U shimolda Kosta-Rika va janubda Kolumbiya bilan chegaradosh.
Daryen yorig‘i Panama janubidagi Daryen milliy bog‘ida joylashgan. Daraning janubiy qismidagi Atrato daryosi deltasi 80 km kenglikdagi botqoqli yo‘llarni hosil qiladi, mintaqa shimolida balandligi 1 875 metrga yetadigan tropik o‘rmonlar bilan qoplangan Serraniya del Dariyen tog‘lari joylashgan.
Izoh (0)