Панамада пенсия ислоҳотига қарши давом этаётган норозилик намойишлари туфайли мамлакатда фавқулодда ҳолат эълон қилинди. Бу ҳақда BBC хабар берди.
Мамлакатда дўконлар талон-тарож қилиниб, бинолар вайрон қилингани маълум қилинган. Асосий банан ишлаб чиқарувчиси бўлган мамлакат ҳукуматнинг таъкидлашича, шимоли-ғарбий Бока-дел-Торо провинциясида конституциявий ҳуқуқлар кейинги 5 кун давомида тўхтатилади. Ушбу чора ҳаракатланиш эркинлигини чеклайди ва полицияга ордерсиз ҳибсга олиш имконини беради.
Минтақадаги муаммолар бир ой олдин, маҳаллий банан ишчилари касаба уюшмаси пенсияларни қисқартиришга қарши умуммиллий норозилик намойишига қўшилиб, иш ташлаш эълон қилганида бошланган эди.
“Тартибнинг бузилиши ва тизимли зўравонлик ҳаракатлари шароитида давлат тинчликни кафолатлаш бўйича конституциявий мандатни амалга оширади”, деди президентлик вазири Хуан Карлос Ориляк.
Унинг қўшимча қилишича, бу чора “провинцияни радикаллардан қутқариш” имконини беради. Лотин Америкаси мамлакатида март ойидаёқ пенсия ислоҳоти муносабати билан норозилик намойишлари бошланган эди.
Бока-дел-Тородаги тартибсизликларга асосан Chiquita Brands банан плантацияси ишчилари раҳбарлик қилган. Қарама-қаршилик ўтган ойда компания иш ташлаган минглаб ходимларни ишдан бўшатганидан кейин авж олган. Намойишчилар вилоятда йўл тўсиқларини ўрнатиб, полиция билан тўқнаш келган. Шу ҳафта бошида оломон Chiquita Brands объектларидан бирига, шунингдек, маҳаллий аэропортга зарар етказгани айтилган.
Изоҳ (0)