AQSHning BlackRock investitsiya kompaniyasidagi investorlar Panama kanali portlaridagi aksiyalarning nazorat paketini sotib oladi. Bu haqda The Wall Street Journal xabar berdi.
Hozirda Balboa va Kristobal portlari Gonkongning CK Hutchison kompaniyasi tomonidan boshqariladi. Panamaning ikkita portini sotib olish bo‘yicha bitim 22,8 milliard dollar qiymatida baholanib, u butun dunyo bo‘ylab yana 40 dan ortiq portlarni o‘z ichiga oladi.
Bitimning bevosita ishtirokchisi bo‘lgan WSJ manbasining aytishicha, Hutchison dastlab port biznesini o‘z nazoratidan chiqarishga qaratilgan urinishlarga sud orqali e’tiroz bildirish imkoniyatini ko‘rib chiqqan. Biroq BlackRock kompaniyasining taklifi juda foydali bo‘lgani bois kompaniya rahbari, 96 yoshli Li Ka-shing undan voz kecha olmagan.
Hutchison kompaniyasi Gonkong va Xitoydagi portlarni o‘zida saqlab qoladi. Yana bir nechta Panama portlari boshqa kompaniyalar tomonidan boshqarilsa-da, Balboa va Kristobal eng muhim portlar hisoblanadi.
Tramp prezidentlikka saylanganidan so‘ng, agar Panama kanalidan foydalanishning amaldagi shartlari qayta ko‘rib chiqilmasa, AQSH Panama kanalini o‘z nazoratiga qaytarishni talab qilishi mumkinligini aytgan. U Amerika kemalari uchun yuqori tariflar joriy etilagnidan norozilik bildirgan. AQSH kanal qurilishida XX asrning birinchi yarmida ishtirok etgan, obyekt 1977-yilda Panamaga topshirilgan va 1999-yilda to‘liq mamlakat hukumati nazoratiga o‘tgan.
Trampning ta’kidlashicha, kanal iqtisodiyot va milliy xavfsizlik uchun muhim ahamiyatga egaligi sababli AQSH uchun hayotiy muhim milliy boylik hisoblanadi. Gonkong kompaniyasining kanal obyektlari ustidan nazorati AQSHda eng ko‘p tashvish uyg‘otgan.
Panama prezidenti Xose Raul Mulino Trampga “Panama kanalining har bir metri Panamaga tegishli va shunday bo‘lib qoladi”, deya javob bergan edi.
Izoh (0)