Futbol bo‘yicha Panama terma jamoasi futbolchisi Hilberto Ernandes banditlar tomonidan otib ketildi va shifoxonada vafot etdi.
Voqea 3-sentabr kuni Panama provinsiyasi Kolonda sodir bo‘lgan. Ikkita qurollangan erkak taksi ichidan turib, olomonga qarata o‘q uzgan. Natijada sakkiz kishi jarohat olgan. Ular ichida futbolchi Hilberto Ernandes ham bo‘lgan. Shifoxonaga yetkazilgan futbolchi og‘ir jarohat tufayli vafot etgan.
Jinoyatchilar qochishga ulgurgan. Politsiya taksi haydovchisini ushlashga muvaffaq bo‘lgan. Haydovchining so‘zlariga ko‘ra, banditlar uni 20 ming aholisi bo‘lgan Kolon provinsiyasi tomonga haydashga majburlagan.
4-sentabr kuni Panama politsiyasi gumondor shaxsni qo‘lga olganini ma’lum qildi. Jinoyatning maqsadi, Ernandes asosiy nishon bo‘lgani yoki yo‘qligi haqidagi tafsilotlar ochiqlanmagan.
Ernandes 2023-yilda Panama terma jamoasida debyutini o‘tkazgan va Lionel Messi bilan suratga tushishga ulgurgandi
26 yoshli Hilberto markaziy himoya pozitsiyasida to‘p surgan. Joriy yilning mart oyida Panama safida Gvatemala (1:1) hamda Argentinaga (0:2) qarshi bahslarda maydonga tushgan.
Klub miqyosida esa Ernandes Panamaning “Independyente” safida 35 ta o‘yin o‘tkazib, 8 ta gol urishga muvaffaq bo‘lgan. Klub va Panama futbol federatsiyasi futbolchining oilasiga hamdardlik bildirdi.
Kolon — giyohvand moddalar kontrabandasining eng yaxshi yo‘li. Jinoiy to‘dalar bu joy uchun kurash olib boradi, natijada esa provinsiyada jinoyat ko‘paygan
So‘nggi bir necha oyda Kolon provinsiyasida giyohvand moddalar kontrabandasi avj olgan, ikkita jinoiy guruh eng daromadli yo‘nalishni nazorat qilish uchun kurash olib bormoqda. Joriy yilning o‘zida u yerda 50 dan ortiq qotillik sodir etilgan.
Marhum futbolchi Ernandesning otasi Kolon yoshlarini zo‘ravonlikni to‘xtatishga chaqirdi va mahalliy hokimiyatni odamlarni himoya qilish uchun ko‘proq ishlar olib borishga undadi. U, shuningdek, jinoyatchilarga murojaat qilib: “Boshqa zarar yetkazmang, yaxshisi taslim bo‘ling”, — dedi.
Izoh (0)