Ukraina prezidenti Vladimir Zelenskiy, agar Rossiya DXR, LXR hamda Xerson va Zaporojye viloyatlarining o‘z nazorati ostidagi hududlarida o‘tkazilgan referendumlar natijalarini tan olsa, prezident Vladimir Putin bilan “gaplashadigan gapi bo‘lmasligi”ni ma’lum qildi. Bu haqda u BMT Xavfsizlik kengashi majlisida videoaloqa orqali so‘zlagan nutqida aytib o‘tdi.
“Rossiya tomonidan ushbu soxta referendumlarning normal deb qabul qilinishi, hozir Qrim ssenariysining amalga oshirilishi, Ukraina hududini o‘ziga qo‘shib olish bo‘yicha navbatdagi urinish shuni anglatadiki, bizning Rossiya prezidenti bilan gaplashadigan gapimiz yo‘q. Anneksiya (bosib olish) — uni butun insoniyatga qarama-qarshi qilib qo‘yadigan qadamdir”, — dedi Zelenskiy.
Avgust oyida Zelenskiy, agar referendumlar amalga oshsa, Ukraina Rossiya bilan muzokaralarda qatnashmasligi haqida ogohlantirgandi. Ikki mamlakat delegatsiyalari o‘rtasidagi tinchlik muzokaralari jarayoni bahordan buyon to‘xtatib qo‘yilgan.
Rossiya tarkibiga kirish haqidagi referendumlarda ovoz berish 27-sentabr kuni yakunlandi. Kechki vaqtga kelib, to‘rtta hududda ham byulletenlarning 100 foizi ko‘rib chiqildi. Natijalarga ko‘ra, LXR, DXR va Zaporojye viloyatida ovoz berganlarning 90 foizi, Xerson viloyatida esa 87 foizi Rossiyaga qo‘shilishni qo‘llab-quvvatladi.
Referendumlar boshlanishidan oldinoq Putin Rossiya Donbass, shuningdek, ikki viloyat fuqarolarining yakuniy qarorini qo‘llab-quvvatlashini aytgandi.
Rossiya Federatsiya kengashi raisi Valentina Matviyenko yuqori palata tomonidan yangi hududlarning Rossiya tarkibiga kirishi haqidagi qonunlar ko‘rib chiqiladigan majlis 4-oktabrda o‘tkazilishi mumkinligini aytgandi. Shu bilan birga, u rejadan tashqari yig‘ilishlar o‘tkazish zarurati yo‘qligini ta’kidladi.
Agar to‘rtta hudud aholisi Rossiya tarkibiga kirish istagini bildirsa, bu xohish qo‘llab-quvvatlanishini qayd etgandi.
AQSH va Yevroittifoq esa referendum natijalarini tan olmasligini ma’lum qilgan va u o‘tkazilgan taqdirda, Rossiyaga qarshi yangi sanksiyalar kiritish bilan tahdid qilgandi. Shuningdek, Serbiya va Turkiya ham ovoz berish yakunlarini tan olmasligini bildirgan.
Mavzuga doir:
Izoh (0)