Jiddiy syujetli filmlarning sahna ortida ham kulgili lahzalar yashiringan bo‘ladi. Ba’zan aktyorlarning xatolari yoki kutilmagan holatlar butun jamoani kuldirib yuboradi. Shu kabi vaziyatlar dramatik sahnalarni ham esda qolarli qiladi.
“Oddiy askar Rayanni qutqarish” — Stiven Spilberg allaqachon kashf etilgan g‘oyani qayta yaratgan
“Oddiy askar Rayanni qutqarish” filmini suratga olish paytida Stiven Spilberg yonida minomyot portlagan odam ko‘rishi mumkin bo‘lgan manzarani ko‘rsatishni o‘ylaydi. Bo‘g‘iq tovush va ko‘zlardagi jimirlashdan tashqari, Spilberg kamera silkinishi effektini qo‘shadi. Albatta, u kamerani shunchaki qo‘llari bilan silkita olmasdi, shu bois Stiven yanada qiziqroq usulni o‘ylab topadi: u professional kameraga oddiy drelni mahkamlamoqchi, operatordan 80 metr narida esa uzaytirgich orqali ma’lum vaqtlarda drelni ishga tushiradigan odam joylashtirilishi kerak edi. Shunda kamera tebrana boshlardi. Biroq operator Yanush Kaminski Spilbergga bu effekt kinoda anchadan beri qo‘llanilishini va u uchun hatto Image Shaker deb nomlangan maxsus obyektiv ham yaratilganini aytadi.
“Ajoyib yigitlar” — Robert De Niro soxta pullarni yoqtirmagan
Ko‘plab film va seriallarda soxta pullar ishlatiladi. “Ajoyib yigitlar” filmini suratga olish paytida Robert De Niro soxta pullarni yoqtirmaydi, shuning uchun u film ijodkorlarini haqiqiy pul ishlatishga majbur qiladi. Rekvizitlar uchun mas’ul bo‘lgan Bob Grifon bankka borib, ikki ming dollar naqd pul oladi. Boshqa bir nechta odam ham xuddi shunday qiladi, natijada De Niro har bir suratga olish kunida cho‘ntagida besh ming dollar olib yurardi. U bu pullarni doim sochib yuborardi: choychaqa berardi va kameralar oldida to‘lov qilardi. Tabiiy, hech kim haqiqiy pulni yo‘qotishni istamasdi, shuning uchun kameralar o‘chishi bilanoq, suratga olish maydonidagi hamma qotib qolardi, keyin esa Robert sochgan pullarni yig‘ishardi.
“Troya” — Bred Pitt Erik Banega 750 dollar to‘lagan
“Troya” filmiga Bred Pitt va Erik Bana allaqachon taniqli aktyorlar sifatida kelishgan edi. Erikni “Xalk” va “Qora lochin” filmlari orqali tanishsa, Bredni “Jangchilar klubi”, “Yetti” va “Tanishing, Jo Blek” kabi filmlaridan bilishardi. “Troya”da ular Gektor va Axilles rollarini ijro etishdi va bir nechta jang sahnalarida partnyor ham bo‘lishdi. Aktyorlar o‘z xavfsizligini ta’minlash uchun dublyorlardan foydalanishlari mumkin edi, biroq ular oldindan uzoq tayyorgarlikdan o‘tishganligi sababli barcha sahnalarni o‘zlari bajarishga qaror qilishdi. Pitt va Bane bu borada kelishib ham olishadi: haqiqiy mushtlagan aktyor 50 dollardan 100 dollargacha to‘lashi kerak edi. Suratga olish ishlari yakunida Pitt Erikka yegan zarbalari uchun 750 dollar to‘laydi.
“Interstellar” — Kristofer Nolan dalada makkajo‘xori o‘stirgan
“Interstellar” filmini suratga olishda Kristofer Nolanga ulkan makkajo‘xori dalasi kerak bo‘ldi. U buni kompyuter grafikasi yordamida yaratishi mumkin edi. Biroq Nolan amaliy effektlarni kompyuter grafikasidan afzal ko‘rishi bilan tanilgan, shuning uchun makkajo‘xori dalasi masalasida ham xuddi shunday yo‘l tutdi. Kristofer grafika ishlatish o‘rniga, butun bir makkajo‘xori dalasini o‘stirish uchun odam yolladi. Nolan bu dalada xohlaganini qilishi, ayniqsa, pikapda yurishi mumkin edi. Eng qizig‘i shundaki, suratga olish tugagach, rejissyor dalani shunchaki tashlab ketmadi, aksincha hosilni yig‘ib, barcha makkajo‘xorini sotdi. Bu unga ancha-muncha foyda keltirdi.
“Shindler ro‘yxati” — Spilberg mazkur filmi tufayli universitet diplomini olgan
Mashhur rejissyor Stiven Spilberg o‘smirligida Kaliforniya shtatining Long-Bich davlat universitetiga o‘qishga kiradi. U Universal studiyasi uchun qisqa metrajli film suratga olib, hammani shunchalik hayratga soladiki, bir necha yillik rejissyorlik shartnomasini imzolash taklifini oladi. Tabiiyki, Stiven o‘qishni tashlab, erkin ijodga sho‘ng‘iydi va “Yura davri parki”, “O‘zga sayyoralik”, “Akula”, “Indiana Jons: yo‘qolgan sandiqni izlab”, “Askar Rayanni qutqarish” va “Shindler ro‘yxati” kabi filmlarni suratga oladi. Biroq ota-onasiga hurmat yuzasidan Stiven universitetga qaytishga qaror qiladi. Uning diplom ishi qolgandi, lekin u allaqachon “Shindler ro‘yxati” filmini o‘zining diplom ishi deb hisoblardi. Spilberg o‘zining mashhur filmlaridan biri tufayli diplom oladi. Qabul komissiyasi o‘zlaridan ko‘ra ko‘proq muvaffaqiyatga erishgan odamning ishini baholashga majbur bo‘lganida qanday ruhiy ziddiyatni boshdan kechirganini tasavvur qilish mumkin, xolos.
“Qichqiriq” — Dryu Berrimor haqiqiy qutqaruv xizmatiga qo‘ng‘iroq qilgan
“Qichqiriq” filmining syujeti Dryu Berrimor qahramoni atrofida qurilgan. Unga noma’lum telba odam qo‘ng‘iroq qiladi, so‘ngra qiz hujumga uchraydi va qochishga urinadi, ammo harakatlari besamar ketadi. Bir paytda u telefonni olib, 911 raqamiga qo‘ng‘iroq qilmoqchi bo‘ladi, biroq yordam kutishning ma’nosi yo‘q. E’tiborli tomoni shundaki, telefon sahnasi birinchi urinishdayoq suratga olinmagan, va ma’lum bo‘lishicha, Berrimor haqiqiy qutqaruv xizmatiga qo‘ng‘iroq qilgan ekan. Telefonni o‘chirishi kerak bo‘lgan rekvizitor buni unutgan, Dryu esa kadr ta’sirchanligini oshirish uchun haqiqatan ham o‘sha uch raqamni terish kerak deb o‘ylagan. Natijada simning narigi tomonidagi navbatchi qandaydir qizning qo‘ng‘iroq qilib, go‘shakka nimadir deb baqirganini va keyin uzilib qolganini eshitgan. Bu holat bir necha marta takrorlangan. Faqat politsiyaning o‘zi qayta qo‘ng‘iroq qilib, tushuntirish talab qilganidan keyingina rekvizitor xato qilganini tushunib yetgan.
Izoh (0)