Korrupsiyaga qarshi kurashish doirasida Davlat xavfsizlik xizmati xodimlari tomonidan Toshkent viloyatida bir nechta tezkor tadbirlar o‘tkazildi.
Jumladan, Majburiy ijro byurosining Qibray tuman bo‘limi davlat ijrochisi fuqaroning kredit qarzdorligi sababli xatlovga olingan mol-mulkini auksion savdolarga chiqarmaslik hamda unga nisbatan o‘zining ish yurituvida bo‘lgan ijro ishini tugatib berish evaziga 5 ming dollar talab qilib, oldindan 2 ming dollar olgan va qolgan 3 ming dollarni olgan vaqtida ashyoviy dalillar bilan ushlangan.
Hozir davlat ijrochisiga nisbatan Jinoyat kodeksining 210-moddasi (pora olish) 2-qismi “v” bandi bilan jinoyat ishi qo‘zg‘atilib, qamoq ehtiyot chorasi qo‘llanilgan. Tergov harakatlari olib borilmoqda.
Zangiota tumanida Soliq inspeksiyasining sho‘ba boshlig‘i vazifasini bajaruvchi shaxs qurilish mollari ishlab chiqarishga ixtisoslashgan oilaviy korxonaning faoliyatiga rahnamolik qilish va 1 yil davomida tekshiruv o‘tkazmaslik evaziga 1200 dollar olgan vaqtida ashyoviy dalillar bilan ushlandi.
Mazkur mansabdor shaxsga nisbatan Jinoyat kodeksining 210-moddasi (pora olish) 2-qismi “v” bandi bilan jinoyat ishi qo‘zg‘atilib, qamoq ehtiyot chorasi qo‘llanildi.
Toshkent viloyati bojxona boshqarmasining “Yallama” chegara bojxona posti inspektor-surishtiruvchisi taqiqlangan tovarlarni tadbirkor tomonidan O‘zbekistonga olib kirish bo‘yicha sodir etilgan huquqbuzarlikni sudda ko‘rib chiqilish jarayonida mansabdor tanishlari orqali unga yengillik yaratish va ushbu tovarlarni O‘zbekistondan qaytarib olib chiqib ketishida yordam berish evaziga 1000 dollar olgan vaqtida ushlandi.
Tergovga qadar tekshiruv davomida bojxona inspektori mazkur masalada ko‘maklashish uchun muqaddam 300 dollar olganligi ham maʼlum bo‘ldi.
Hozirda unga nisbatan Jinoyat kodeksining 168-moddasi (firibgarlik) 3-qismi “v” bandi va 28, 211-moddasi 1-qismi bilan jinoyat ishi qo‘zg‘atilib, qamoq ehtiyot chorasi qo‘llanildi.
Avvalroq Qashqadaryo, Navoiy, Buxoro va Sirdaryo viloyatlarida advokatlarning noqonuniy qilmishlari fosh etilgani xabar berilgandi.
Izoh (1)
MIB ni tugatish kerak butunlay