Andijonda o‘z vazifasini bajarish uchun 4 ming dollar pora so‘ragan MIB xodimlari ushlangani to‘g‘risida xabar berilgandi. Mazkur holat sabab Majburiy ijro byurosining Andijon shahar va Andijon tuman bo‘lim boshliqlari lavozimlaridan ozod qilingan. Bu haqda byuro matbuot xizmati “Daryo”ga ma’lum qildi.
14-yanvar kuni byuroning Andijon shahar bo‘limi davlat ijrochisi F.F. va Andijon tuman bo‘limi davlat ijrochisi I.Q.ning fuqaro O.Q.dan 4 ming dollar olgan vaqtida ashyoviy dalillar bilan jinoyat ustida ushlangan. Hozirda ularga nisbatan hozirda jinoyat ishi doirasida tergov harakatlari olib borilmoqda.
Ta’kidlanishicha, qo‘l ostidagi xodimlar ustidan yetarli nazorat o‘rnatmay, mas’uliyatsizlikka yo‘l qo‘yib, xodimlar tomonidan korrupsiya va boshqa suiiste’molchiliklar sodir etilishining oldini olish choralarini ko‘rmagani uchun byuroning Andijon shahar bo‘limi boshlig‘i Sh.U. hamda Andijon tuman bo‘limi boshlig‘i A.B. o‘z lavozimlaridan ozod qilingan.
Ma’lumot uchun, o‘tgan davrda MIB Shaxsiy xavfsizlik tarmoqlarining xizmat tekshiruvlari natijalariga ko‘ra, qo‘pol qonunbuzilishiga yo‘l qo‘ygan 69 nafar xodim intizomiy jazo tariqasida byuro organlaridan bo‘shatilgan. Shuningdek, byuroning 24 nafar xodimi tomonidan sodir etilgan jinoyat holatlarining 18 tasi shaxsiy xavfsizlik tarmoq xodimlarining tashabbuslari asosida fosh etilgan.
Avvalroq Buxoroda qarzni undirishga kelgan MIB xodimini kaltaklagan korxona rahbari javobgarlikka tortilgani, xodimlarini haqorat qilgan Angren MIB boshlig‘i hayfsan olgani to‘g‘risida xabar berilgandi.
Izoh (0)