2019-yilda MIB xodimlariga qarshilik ko‘rsatish bilan bog‘liq 132 ta holat aniqlanib, aybdorlarga nisbatan qonuniy chora ko‘rildi. Yil davomida xodimlar tomonidan 26 ta jinoiy holatlarga yo‘l qo‘yilgani fosh etildi. Hozirda ushbu noqonuniy xatti-harakatlar yuzasidan tekshiruv ishlari olib borilmoqda. Bu haqda 22-yanvar kuni AOKAda Bosh prokuratura huzuridagi MIB rahbariyati ishtirokida o‘tkazilgan matbuot anjumanida ma’lum qilindi, deya xabar bermoqda “Daryo” muxbiri Mirolim Isajonov.
Tadbirda ta’kidlanishicha, aksariyat hollarda Byuro faoliyatiga doir ma’lumotlarni ayrim OAV va ijtimoiy tarmoqlarga joylashtirishda obyektiv baho berilmayapti. Ba’zi shaxs yoki guruhlar manfaati uchun bir tomonlama yondoshilib, amaldagi qonunchilik talablari inobatga olinmayapti.
“Albatta, har bir xabarga muntazam huquqiy baho berib boryapmiz. Agar iste’molchi nohaq bo‘lsa, bu haqda unga tushuntiramiz. Tarqatilgan axborotga obyektiv yondashilmasa, ommaviy axborot vositalari va jurnalistlarga rasmiy munosabatimiz yoki raddiyamizni bildiramiz. Bunday vaziyatlarda xodimning xatosi yoki aybi bo‘lsa, unga ham murosasiz munosabat bildirib, qa’tiy chora ko‘riladi.
Achinarlisi, to‘lov qobiliyatiga ega fuqarolar orasida qarzdorlikni bartaraf etish o‘rniga, ijtimoiy tarmoqlar orqali Byuro faoliyati haqida noto‘g‘ri xabarlarni joylashtirishga harakat qilayotganlar ham yo‘q emas. Faoliyatimizga oid har qanday masala bo‘yicha aholi uchun qisqa “1107” ishonch telefon raqami kun-u tun ishlayapti. Har bir murojaat nazoratga olingan holda, atroflicha o‘rganilib, qonuniy baho beriladi. O‘z navbatida amaliy yordam ko‘rsatib, muammolarni ham hal etish bo‘yicha choralarni ko‘ramiz”, — dedi MIBning jamoatchilik bilan aloqalar va huquqiy axborot bo‘limi boshlig‘i Farruh Toshpo‘latov.
Matbuot anjumanida ma’lum qilinishicha, Byuro organlarida xodimlar tomonidan sodir etilayotgan korrupsiya va nojo‘ya xatti-harakatlar ham uchrab turibdi. MIB o‘z vazifasini suiiste’mol qilib, tamagirlik va pora olish holatlariga qo‘l urgan xodimlariga ham qarshi keskin kurashmoqda. 2019-yilda 26 ta jinoiy holatda MIB vakillarining aloqasi mavjudligi aniqlandi. 2 ming nafardan ko‘proq xodimlar kasbiy malaka oshirish hamda ma’naviy-axloqiy jihatdan tarbiyalash, profilaktik va tushuntirish tadbirlariga jalb etildi.
“To‘lov intizomini mustahkamlash orqali qarzdorlikni kamaytirish, energiya tarmoqlariga noqonuniy ulanish, sud va boshqa organ hujjatlarining ijrosini ta’minlash kabi vazifalarini bajarish xodimlarimizga oson kechmayapti.
Byuro tashkil etilganidan, ya’ni 2017-yil iyun oyidan beri ish hajmining ko‘pligi va og‘ir sharoitda ishlashni hohlamagan 7 ming 300 nafardan ziyod xodimlar o‘z xohishiga ko‘ra ishdan bo‘shatildi.
Fuqarolarimizning xodimlarni qonuniy talabini bajarish o‘rniga, vaziyatni o‘z tomoniga og‘dirish maqsadida qarshilik ko‘rsatishi tufayli 4 nafar xodim o‘z vazifasini bajarish vaqtida vafot etdi. 200 dan ortiq xodimlarga turli darajada tan jarohati yetkazildi.
Shu o‘rinda iste’molchilarni energiya resurslaridan foydalanishga oid shartnoma majburiyatlari va to‘lov intizomiga rioya qilishlarini so‘rab qolardik”, — dedi MIB direktorining birinchi o‘rinbosari Hasan Kabirjonov.
Izoh (0)