“Hududgaztaʼminot” issiqxona xo‘jaliklariga yetkazib beriladigan tabiiy gazga qisman cheklovlar kiritilayotganini ma’lum qildi.
12-dekabr kuni ijtimoiy tarmoqlarda Samarqand viloyatidagi issiqxonaga tabiiy gaz yetkazib berish 50 foizga qisqargani haqida ogohlantirish xati tarqalgandi. “Hududgaztaʼminot” bunga javoban havo haroratining keskin pasayishi natijasida isteʼmolchilarning tabiiy gazga bo‘lgan talabi keskin oshib, buning natijasida ayrim hududlardagi quvurlarda gaz bosimining pasayishi kuzatilayotganini qayd etdi.
“Birinchi navbatda aholi xonadonlari va ijtimoiy soha obyektlarini tabiiy gaz bilan taʼminlash ustuvor vazifa ekanligini inobatga olgan holda ayrim ulgurji isteʼmolchilarga cheklovlar kiritilmoqda”, deyiladi “Hududgaztaʼminot” munosabatida.
Bildirilishicha, prezidentining 2024-yil 26-sentyabrdagi qaroriga muvofiq bosim tushishi yoki uzilishlar bo‘yicha issiqxona xo‘jaliklarini kamida 24 soat oldin “Hududgaztaʼminot” AJ tomonidan majburiy xabardor qilish amaliyoti joriy qilinishi belgilangan. Gaz taʼminoti korxonalari tomonidan doim mazkur amaliyot bo‘yicha ish yuritilib, cheklov kiritilishidan kamida 24 soat avval issiqxona xo‘jaliklariga ogohlantirish yuboriladi.
Vazirlar Mahkamasining 2023-yil 27-oktyabrdagi qaroriga ko‘ra, aholining gaz taʼminoti tizimida favqulodda holatlar yuzaga kelganda, issiqxona xo‘jaligida yetarli miqdorda muqobil yoqilg‘i zaxirasining mavjud bo‘lishi belgilangan. “Hududgaztaʼminot”, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari hamda issiqxona xo‘jaliklari o‘rtasida uch tomonlama kelishuvda ham ko‘rsatib o‘tilgan.
Shu munosabat bilan uch tomonlama shartnoma shartlariga muvofiq issiqxona xo‘jaliklariga yetkazib beriladigan tabiiy gazga qisman cheklovlar kiritilgan davrlarda issiqxona xo‘jaliklari zaxira yoqilg‘i turlaridan foydalanishga vaqtinchalik o‘tishi lozim bo‘ladi.
“Qayd etish kerak, mazkur cheklovlar faqat havo harorati keskin pasayib ketgan vaqtda qo‘llaniladi. Quvurlardagi gaz bosimlari barqarorlashganda cheklovlar bekor qilinishini maʼlum qilamiz”, deyiladi munosabatda.
Noyabr oxirlarida Energetika vazirligi issiqxonalar tabiiy gaz uchun to‘lovlarni amalga oshirgan holda foydalanishlari mumkinligi, ularga tabiiy gaz yetkazib berish bo‘yicha hech qanday cheklovlar mavjud emasligini ma’lum qilgandi.
Issiqxona xo‘jaliklariga hosil yilining dastlabki 3 oyida (oktyabr, noyabr va dekabr) yetkazib beriladigan tabiiy gaz uchun oldindan to‘lov 50 foiz miqdorida, qolgan qismi oy yakuniga qadar, keyingi oylardan boshlab esa har oyda 100 foiz oldindan to‘lov amalga oshiriladi.
Prezidentning 26-sentyabrdagi qaroriga ko‘ra, bosim tushishi yoki uzilishlar bo‘yicha issiqxona xo‘jaliklari kamida 24 soat oldin “Hududgazta’minot” tomonidan majburiy xabardor qilish amaliyoti joriy qilingan.
Energetika vazirligi axborotiga ko‘ra, so‘nggi kunlarda respublika hududiga sovuq havo oqimi kirib kelishi natijasida energiya resurslariga bo‘lgan talab sezilarli darajada oshib bormoqda. Bugungi kunda aholining tabiiy gaz kunlik isteʼmoli o‘tgan haftadagiga nisbatan 20 foizga, elektr energiyasi isteʼmoli esa 15 foizga ortgan.
Izoh (0)