Toshkent viloyatidagi mavjud sement, g‘isht zavodlari hamda issiqxonalar 2023-yil yakuniga qadar to‘liq ko‘mir bilan isitish tizimiga o‘tkaziladi. Bu haqda Xalq deputatlari Toshkent viloyati kengashining navbatdagi 74-sessiyasida so‘z borgan.
.jpg)
“Sessiyada davlat rahbarining 2023-yil 16-fevraldagi 2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari to‘g‘risidagi qarorining Toshkent viloyatidagi ijrosi bo‘yicha qilinayotgan ishlar muhokama qilindi. Respublika va viloyat ishchi guruhlari tomonidan elektr energiya va tabiiy gazning viloyat hududiga kirishidan boshlab, oxirgi isteʼmolchining nuqtalarigacha bo‘lgan har bir tarmoq, transformator, gaz taqsimlash punktlarining bugungi kundagi isteʼmol holati o‘rganildi”, — deydi viloyat hokimligi axborot xizmati rahbari Behzod Qobulov.
Taʼkidlanishicha, Toshkent viloyatdagi mavjud 1120 ta ijtimoiy soha obyektni davlat-xususiy sheriklik asosida ko‘mir yoqilg‘isiga o‘tkazish uchun viloyat 100 ming tonna ko‘mir mahsuloti xarid qilishi lozim bo‘ladi.
“Shuningdek, 61 ta issiqxona to‘liq ko‘mirga o‘tkaziladi. Natijada, 32,1 million kub/metr tabiiy gaz yoki 32,1 milliard so‘m mablag‘ iqtisod qilinadi”, — deydi masʼul.
Bundan tashqari, sessiyada aholi isteʼmolchilarini quyosh panellari va geliokollektorlar bilan taʼminlash orqali millionlab energiya tejalishiga erishilishi taʼkidlangan.
“Yuqoridagi masalalar yuzasidan deputatlarning mulohazalari tinglanib, hududlardagi ko‘cha yoritish chiroqlarini ham 100 foiz quyosh panellarida ishlovchi yoritish qurilmalariga almashtirish taklifi ilgari surildi va maʼqullandi”, — deydi Behzod Qobulov.
Avvalroq Shavkat Mirziyoyev 11-may kuni bo‘lib o‘tgan yig‘ilishda hududlarda energiyani tejash masalasiga to‘xtalib o‘tgani, ko‘mirga talab shu yilning o‘zida 1,5 baravarga oshishi kutilayotganini hisobga olib, joriy yilda ko‘mir qazib chiqarishni 5,3 million tonnadan 6,5 million tonnaga olib chiqish zarurligini qayd etgani xabar qilingandi.
Izoh (0)