Qishloq xo‘jaligi vazirligi O‘zbekistonda issiqxonalar falokat yoqasida ekani haqidagi fikrlarga munosabat bildirdi

Iqtisodchisi Yuliy Yusupov O‘zbekistonda issiqxonalar gazdan ko‘mirga o‘tayotgani haqida fikr bildirib, bu ko‘plab ishlab chiqarish obyektlarini rentabellikka olib kelib va ularni yopishga sabab bo‘lishini aytdi. Qishloq xo‘jaligi vazirligi bunga munosabat bildirdi.

Vazirlik iqtisodchining “O‘zbekistondagi issiqxonalar falokat yoqasida” sarlavhasi ostida bildirgan fikrlarini birlamchi taxmin hamda  asosga ega bo‘lmagan fikrlar jamlanmasi deb atadi.

Qayd etilishicha, bugungi kunda mamlakatimiz aholisini sifatli oziq-ovqat mahsuloti bilan ta’minlash maqsadida issiqxonalar maydoni so‘ngi 5 yilda 3 barobarga ko‘payib, 5,2 ming gektarga yetdi, ularda yetishtirilayotgan mahsulotlar hajmi 90 ming tonnadan 300 ming tonnaga ko‘paydi.

Energetika vazirligi tomonidan kuz-qish mavsumida aholi gaz tarmoqlariga ulanmagan issiqxona xo‘jaliklariga tabiiy gaz yetkazib berish bo‘yicha shartnoma tuzish ishlari boshlandi.

Xususan, issiqxona xo‘jaliklari moliyaviy ahvolini yaxshilash va rivojlantirish bo‘yicha respublika ishchi guruhining 3 ta yig‘ilish bayonlari qabul qilinib, issiqxona xo‘jaliklari tomonidan olingan 87 foiz kredit mablag‘larining muddati 14 yilgacha uzaytirildi.

“Tanqidiy ruhda tarqatilgan xabarlar esa, birlamchi taxmin hamda  asosga ega bo‘lmagan fikrlar jamlanmasi. Gap-so‘zlar va mish-mishlar negizida shakllangan ushbu izohlarni aniq dalili bor manbaga aylantirishga urinish joiz emas”, — deyiladi vazirlik munosabatida.

Shuningdek, vazirlik fuqarolarning murojaatlari, shuningdek, sohada olib borilayotgan islohotlarni qo‘llab-quvvatlash, muammolarni o‘rganish va bartaraf etish yuzasidan ochiq muloqotga har doim tayyorligi bildirib o‘tilgan.

“2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari to‘g‘risida”gi prezident qarorida 2023-yilda 5407 ta ijtimoiy obyekt, 1 147 ta issiqxona, 250 ta qurilish materiallari ishlab chiqaruvchi korxona isitish tizimi ko‘mir yoqilg‘isiga o‘tkazilishi belgilangandi. 

Ixtiyoriy ravishda ko‘mir yoqilg‘isida ishlaydigan issiqxonalarga davlat tomonidan rag‘batlantirish paketi joriy qilinadi.