Turkiyalik tadbirkorlar Toshkent viloyatining Piskent tumanida tilla qazish ishlarida ko‘maklashadi, shuningdek, hududda issiqxonalar qurishi rejalashtirilgan. Bu haqda “Daryo”ga Piskent tumani hokimligi axborot xizmati rahbari Nozim Abdulla xabar berdi.
Ma’lum bo‘lishicha, tuman hokimi Muzaffar Aripov boshchiligidagi delegatsiyaning Turkiyaga tashrifida mazkur kelishuvlarga erishilgan.
Turkiyaning Anqara shahrida bo‘lib qaytgan Muzaffar Aripov boshchiligidagi delegatsiya vakillari qimmatbaho metallarni qazib olish faoliyati bilan shug‘ullanuvchi «KSE Madencilik Insaat Senayl ve Tic. A.S» korxonasi faoliyati bilan yaqindan tanishgandi. Tuman hokimi va mazkur korxona vakillari o‘rtasida o‘zaro hamkorlik qilish hamda Piskent tumaniga investisiya kiritish yuzasidan muzokaralar o‘tkazilgandi. Muloqot davomida tillani qazish ishlarini amalga oshirib, kon ishlari bilan shug‘ullanadigan “KSE Madencilik Insaat Senayl ve Tic. A.S” korxonasi tumandagi tilla zavodiga kavlab olish borasida xizmat ko‘rsatishiga kelishildi, — deydi Nozim Abdulla.
Mas’ulning qo‘shimcha qilishicha, Muzaffar Aripovning Turkiyaga safari chog‘ida Turkiya texnologiyasi asosida issiqxonalar qurish bo‘yicha ham kelishuvlar qilingan.
Hokim boshchiligidagi delegatsiya vakillari Turkiya Respublikasidagi “GUNEY cyeracilik” korxonasida ham bo‘lib, investorlar bilan muloqot qildi. Muloqot davomida Turkiyadagi ushbu korxona zamonaviy issiqxonalar qurish uchun ixtisoslashganligi, bugungi kunga qadar ko‘plab davlatlarda issiqxona majmualarini qurib topshirgani ochiqlandi. Shu sabab tuman hokimi korxona vakillarini Piskentga taklif qilib, hududda mazkur zavodni qurish yuzasidan kelishuv qilishni taklif qildi, — deydi hokimlik axborot xizmati rahbari.
Izoh (0)