Toshkent va Yangiyo‘l tumanlari aholisi tabiiy gaz ta’minotidan uzib qo‘yilgani hamda elektron gaz hisoblagich o‘rnatilgan xonadonlarda gazning avtomatik tarzda o‘chib qolishi va to‘lov mavjud bo‘lganiga qaramay tarmoqqa qayta ulanish muammolari 23—24-fevral kunlari ijtimoiy tarmoqlarda ko‘plab keskin muhokamalarga sabab bo‘lgandi. Iste’molchilar huquqlarini himoya qilish agentligi bunga elektron gaz hisoblagichlarni o‘rnatish jarayonida dalolatnomalar noto‘g‘ri rasmiylashtirilgani sabab bo‘lganini ma’lum qilgandi.
“Hududgazta’minot” bu holatga rasmiy munosabat bildirib, gaz ta’minoti ogohlantirishlarga qaramay, iste’molchilar to‘lovlarni amalga oshirmagani uchun gaz ta’minotidan o‘chirilganini bildirdi.
Xabarda aytilishicha, Yangiyo‘l tumani va Yangiyo‘l shahrida hozirgi kunda jami 55 641 ta gaz iste’molchisi mavjud bo‘lib, shulardan 16 970 tasiga zamonaviy gaz hisobdon o‘rnatilgan. Iste’mol qilingan tabiiy gaz uchun qarzdorlik 2 milliard 401 million so‘mdan ortiqni tashkil etmoqda.
Jumladan, Yangiyo‘l tumanidagi xonadonlarda issiqxonalar mavjud bo‘lgan “Darxon” mahallasida 337 ta iste’molchi bo‘lib, 2019-yilning dekabr oyida 68,6 million so‘mlik jami 180,5 ming kub metr tabiiy gaz yetkazib berilib, undirilgan mablag‘ atigi 48,2 foizni tashkil etgan. 2020-yil mazkur mahallaga to‘liq zamonaviy hisobdonlar o‘rnatilib, natijada 2021-yilning yanvar oyi holatiga ko‘ra, 110,9 million so‘mlik 288,3 ming kub metr (2019-yil dekabr oyiga nisbatan 4,2 barobar ko‘p) tabiiy gaz yetkazib berilib, tushum ko‘rsatkichi 215,3 foizni tashkil qilgan.
Iste’mol qilingan tabiiy gaz uchun qarzdorligi bo‘lgan iste’molchilarga tarmoqdan avtomatik tarzda o‘chirilishlaridan 3 kun avval, gaz hisoblagich o‘rnatilayotgan vaqtda imzolangan shartnomaga iste’molchi tomonidan taqdim etilgan telefon raqamiga ogohlantirish SMS xabarlar yuborilmoqda va yangi tizim joriy etilayotganini hisobga olgan holda, bu kabi SMS’lar bir necha marta iste’molchilarga jo‘natilmoqda. Ogohlantirishlarga qaramay, to‘lovlarni amalga oshirmagan iste’molchilar uchun gaz ta’minoti avtomatik tarzda to‘xtatilmoqda.
“Hududgazta’minot” shu bilan birga, iste’molchilar orasida noreal qarzdorlik hisoblanishi oqibatida gaz ta’minotidan uzilish bo‘yicha masalalar yuzaga kelayotganiga ham izoh berib o‘tgan.
“Yuqoridagi holatlar bo‘yicha iste’molchilarning barcha murojaatlari mutaxassislar tomonidan ko‘rib chiqilmoqda. Tahlillar shuni ko‘rsatmoqdaki, bunday holatlar paydo bo‘lishida asosan avvallari gaz hisoblagichdagi ko‘rsatkichlarning BillingGaz tizimiga noto‘g‘ri kiritilganligi, hisobdonlar nosozligi va boshqa sabablar tufayli yuzaga kelgan”, — deyiladi xabarda.
Bundan tashqari, noreal qarzdorlik bo‘yicha shikoyat qilayotganlar orasida avval o‘rnatilgan hamda ASKUG tizimini qo‘llab-quvvatlamaydigan maishiy gaz hisoblagichlardagi ko‘rsatkichlarni “orqaga” qaytarganlar ham aniqlanayotgani qayd etilgan. “Hududgazta’minot” iste’mol qilingan tabiiy gaz to‘lovlaridan “tejash” maqsadida gaz hisoblagich ko‘rsatkichlarini “orqaga” aylantirmaslikka chaqirib, bunday xatti-harakatlar noqonuniyligini eslatib o‘tgan.
Shuningdek, tabiiy gaz bo‘yicha hisob-kitobni yuritish onlayn tizimga o‘tkazilayotgani ta’kidlab o‘tilgan.
“Iste’molchilarda bahsli holatlar mavjud bo‘lmagan taqdirda, qimmatli vaqtni tuman yoki shahar gaz bo‘limlariga qatnab, zoye ketkazmay, o‘z shaxsiy kabinetlari orqali tabiiy gaz iste’moli, amalga oshirilgan to‘lov va mavjud penyalar holatini onlayn tarzda nazorat qilib borishlari mumkin. Bundan tashqari, foydalanilgan tabiiy gaz uchun to‘lovlarni uydan chiqmasdan Payme, Paynet, Click, U-Pay va Oson mobil ilovalaridan biri orqali tez va oson amalga oshirish mumkin”, — deyiladi “Hududgazta’minot” xabarida.
Avvalroq “Hududgazta’minot” Andijonda gaz hisoblagich portlaganiga izoh bergandi.
Izoh (0)