Toshkent viloyatida ikkita issiqxona tabiiy gazdan noqonuniy foydalanishi natijasida tizimga 577 million so‘mdan ziyod zarar yetkazilgani aniqlandi. Bu haqda Energetika vazirligi matbuot xizmati xabar berdi.
Ma’lum qilinishicha, “O‘zenergoinspeksiya” tomonidan Bosh prokuratura va huquqni muhofaza qiluvchi boshqa organlar, shuningdek, “Hududgaztaʼminot” AJ xodimlari bilan hamkorlikda Toshkent viloyatida navbatdagi nazorat tadbirlari o‘tkazilgan.
Xususan, Zangiota tumanida joylashgan “M.A.” MCHJ (495 million 56 ming so‘mlik) va ushbu tumanda istiqomat qiluvchi fuqaro E.Q. ga qarashli issiqxonalar (82 million 381 ming so‘mlik) tabiiy gaz hisoblagichisiz, tarmoqqa noqonuniy ravishda ulanganligi natijasida davlat manfaatlariga jami 577 million so‘mdan ziyod zarar yetkazgani maʼlum bo‘lgan.
Qoidabuzar isteʼmolchilarga nisbatan belgilangan tartibda chora ko‘rish uchun tegishli hujjatlar rasmiylashtirilib, huquqni muhofaza etuvchi organlarga taqdim qilingan.
Avvalroq Samarqandda noqonuniy oltin qazuvchilar 753 mln so‘mlik elektr energiyasini o‘g‘irlagani ma’lum bo‘lgani, Asakada elektr tarmoqlari muhandisi 13 mln so‘mni firibgarlik yo‘li bilan qo‘lga kiritgani aniqlangani to‘g‘risida xabar berilgandi.
Izoh (0)