“Toshkent shahri va uning atrofidagi issiqxonalar va sanoat korxonalari tomonidan atmosferaga chiqarilayotgan tutun va zaharli gazlarni keskin kamaytirish chora-tadbirlari to‘g‘risida”gi prezident farmoni loyihasi e’lon qilindi.
Unga ko‘ra, 2024-yil 1-oktyabrdan boshlab tabiiy gazdan yoqilg‘i sifatida foydalanuvchi issiqxona xo‘jaliklari va sanoat korxonalarining ekologiya ekspertiza xulosasi mavjud bo‘lmagan taqdirda ularga tabiiy gaz yetkazib berilishiga yo‘l qo‘yilmaydi.
Ko‘mir, mazut va pellet yoqilg‘isida faoliyat olib boruvchi issiqxona xo‘jaliklari va sanoat korxonalari, shu jumladan qurilish materiallari ishlab chiqarish zavodlarining yangi ishlab chiqarish quvvatlaridagi atmosfera havosini ifloslantiruvchi ustuvor manbalarida samaradorlik darajasi 99,5 foizdan kam bo‘lmagan, amaldagi ishlab chiqarish quvvatlaridagi ifloslantiruvchi ustuvor manbalarida samaradorlik darajasi 95,0 foizdan kam bo‘lmagan chang-gaz tozalash uskunalarini o‘rnatmagan taqdirda ularning faoliyati ushbu talab bajarilgunga qadar to‘xtatiladi.
Tabiiy gazdan noqonuniy ravishda foydalanganda yoki gaz hisoblagichlardan tabiiy gaz nazorati va hisobining avtomatlashtirilgan tizimiga iste’molchining aybi bilan onlayn ravishda ma’lumotlar uzatilishini to‘xtatish holatlari aniqlanganda, ushbu iste’molchilar bilan tabiiy gaz yetkazib berish bo‘yicha tuzilgan shartnomalar bekor qilinadi va bir yil muddatda shartnomalarni qayta tiklash taqiqlanadi.
Izoh (0)