Janubiy Koreyada Jeju Air avikompaniyasi yo‘lovchi samolyoti halokatga uchradi. Bu haqda Yonhap agentligi xabar berdi.
Ma’lum qilinishicha, voqea 29-dekabr kuni soat 09:07 da (Toshkent vaqti bilan 05:07 da) Muan shahri aeroportida yuz bergan. Shassisi ochilmagan samolyot uchish-qo‘nish yo‘lagidan chiqib ketib, to‘siqqa urilgan va yonib ketgan.
Bangkokdan uchib kelgan Boeing 737 samolyoti bortida 173 nafar Janubiy Koreya va 2 nafar Tailand fuqarosi bo‘lgan. Ayni paytda kamida 28 kishi halok bo‘lgan. Ularning barchasi samolyotning dum qismida bo‘lgan.
Hodisa joyida qutqaruv operatsiyasi olib borilmoqda. Rasmiylar halokatning sabablarini aniqlash uchun tergov boshladi.
Bundan bir necha kun avval Bokudan Grozniyga uchayotgan Embraer 190 samolyoti Qozog‘istonda qulab tushgandi. Azerbaijan Airlines samolyoti qulashi oqibatida 38 kishi halok bo‘lgan. Samolyot bortida jami 67 kishi — 62 yo‘lovchi va besh ekipaj a’zosi bo‘lgan. Kamida 29 nafar yo‘lovchi tirik qolgan. Ular samolyotning dum qismida bo‘lgan.
Azerbaijan Airlines kompaniyasi Qozog‘istonning Oqtov shahri yaqinida qulagan samolyotning halokatiga “tashqi jismoniy va texnik ta’sir” sabab bo‘lganini ma’lum qildi.
Euronews telekanali Ozarbayjon samolyotining halokatiga Rossiya raketasi sabab bo‘lganini xabar qildi. Reuters agentligi esa mazkur samolyotni Rossiyaning “Pantsir-S” mudofaa tizimi qulatgani haqida maqola e’lon qildi. Rossiya aviatsiyasi rahbari bergan bayonotida halokatga Ukraina dronlari va quyuq tumanni sabab qilib ko‘rsatgan.
28-dekabr kuni Rossiya prezidenti Vladimir Putin Ozarbayjon prezidenti Ilhom Aliyev bilan suhbat chog‘ida Azerbaijan Airlines samolyoti bilan sodir bo‘lgan fojiali voqea uchun uzr so‘radi.
Holat yuzasidan “Havo transporti harakati va harakat xavfsizligi qoidalarini buzish” moddasi bo‘yicha jinoiy ish qo‘zg‘atilgan.
Izoh (0)