American Airlines Group Inc aviakompaniyasi ikkita aviahalokatdan keyin to‘xtatib qo‘yilgan Boeing 737 MAX samolyotlari parvozini tikladi, deb xabar bermoqda “Interfaks”.
Qayd etilishicha, birinchi reys Mayamidan Nyu-Yorkka amalga oshirilgan, yo‘lovchilar orasida aviakompaniya prezidenti Robert Aysom ham bo‘lgan.
Aviakompaniya ma’lum qilishicha, AQSh fuqarolik aviatsiyasi federal boshqarmasi (Federal Aviation Administration, FAA) noyabrda tegishli ruxsatnomani taqdim etganidan keyin, endi Boeing 737 MAX’ni asta-sekinlik bilan ekspluatatsiyaga qaytarishni rejalashtirmoqda.
Shuningdek, aviakompaniya yo‘lovchilarga reys qaysi samolyotda amalga oshirilishi haqida qo‘shimcha ma’lumot berishni boshlagan, bu ular MAX samolyotida amalga oshiriladigan parvoz haqida oldindan xabardor bo‘lishi uchundir.
Eslatib o‘tamiz, 2019-yilning 10-mart kuni Ethiopian Airlines aviakompaniyasining Keniyaga uchayotgan Boeing 737-800 MAX samolyoti halokatga uchrashi oqibatida bortda bo‘lgan 149 nafar yo‘lovchi, shuningdek, sakkiz nafar ekipaj a’zosi halok bo‘lgan. 2018-yilning 29-noyabr kuni Lion Air aviakompaniyasining Boeing 737 yo‘lovchi samolyoti Jakarta aeroportidan havoga ko‘tarilganidan ko‘p o‘tmay halokatga uchrab, dengizga qulagan. Samolyot bortida 189 kishi bo‘lgan. Shulardan 181 nafari yo‘lovchi, 2 nafar uchuvchi hamda 6 nafar ekipaj a’zosi. Ularning barchasi halok bo‘lgan.
Avvalroq AQSh ushbu samolyotlar parvoziga ruxsat bergani haqida xabar berilgandi. Braziliya aviakompaniyasi esa ikki aviahalokatdan so‘ng dunyoda birinchi bo‘lib Boeing 737-8 MAX samolyotlari parvozini tiklagan edi.
Mavzuga doir:
- Braziliya aviakompaniyasi ikki aviahalokatdan so‘ng dunyoda birinchi bo‘lib Boeing 737-8 MAX samolyotlari parvozini tikladi
- AQSh Boeing 737 MAX havo kemalarining parvoziga ruxsat berdi. Parvozlar ikkita aviahalokat sabab 1,5 yil oldin to‘xtatilgandi
- Boeing kompaniyasi ikkita aviahalokatdan keyin to‘xtab qolgan 737 MAX modellarini qayta yig‘ishni boshladi
Izoh (0)