21-mart kuni Xitoy janubida halokatga uchragan Boeing 737 samolyoti bort o‘ziyozarlaridan olingan ma’lumotlar u ataylab yerga qulatilganini tasdiqlash imkonini beradi. Halokat sabablarini o‘rganish bilan shug‘ullanayotgan amerikalik ekspertlar shunday xulosaga keldi, deb yozadi Meduza.
Bort o‘ziyozarlari ma’lumotlariga qaraganda, balandlikni keskin pasaytirish haqidagi buyruq uchuvchilar kabinasida bo‘lgan bir odam tomonidan berilgan. “Samolyot kabinadagi odam nima degan bo‘lsa, shuni qilgan”, — deb The Wall Street Journal manbasi ma’lum qilgan. Amerikalik ekspertlar endi tekshiruv ishlarini uchuvchilarning xatti-harakatlariga qaratdi, ammo kabinaga begona odam kirib, samolyotni yerga yo‘naltirgani istisno qilinmayapti.
Aviahalokat sabablarini o‘rganayotgan xitoylik aviaekspertlar samolyot halokatini keltirib chiqarishi mumkin bo‘lgan hech qanday texnik nosozliklarni aniqlamagan.
Kunmindan Guanchjouga reysni amalga oshirayotgan China Eastern Airlines aviakompaniyasi samolyoti 21-mart kuni Xitoy janubidagi tog‘li hududda qulab tushgandi. Bortdagi 133 kishining barchasi halok bo‘ldi.
2015-yil 24-mart kuni Fransiya janubidagi Alp tog‘larida Germanwings aviakompaniyasining yo‘lovchi samolyoti halokatga uchragandi. Surishtiruv chog‘ida samolyot kabinada yolg‘iz qolgan ikkinchi uchuvchi Andreas Lyubits tomonidan qasddan yerga yo‘naltirilgani aniqlandi. Birinchi uchuvchi ichkariga kirib, halokatning oldini ololmasligi uchun u kabina eshigini qulflab qo‘ygan.
Aviahalokat oqibatida 150 kishi qurbon bo‘lgandi. Lyubits salomatligi tufayli uchuvchilik kasbini tez orada tark etmoqchi bo‘lgani aniqlangan. Shuningdek, u depressiyadan davolangani ma’lum bo‘lgan. O‘z salomatligi bilan bog‘liq muammolarni Lyubits aviakompaniyadan bekitgan. Samolyot halokatidan keyin Yevroittifoqda va boshqa qator mamlakatlarda parvozlar xavfsizligi qoidalari qayta ko‘rib chiqilgandi.
Mavzuga doir:
Izoh (0)