WSJ: Indoneziyadagi aviahalokatga Boeing dvigateli bilan bog‘liq muammo sabab bo‘lgan bo‘lishi mumkin

Indoneziyaning Sriwijaya Air kompaniyasiga tegishli, 9-yanvar kuni halokatga uchragan Boeing 737-500 samolyotining qulashiga dvigatellar nazorati bilan bog‘liq muammolar va uchuvchilarning ularni bartaraf qilishga urinishi sabab bo‘lgan bo‘lishi mumkin. Bu haqda The Wall Street Journal tekshiruv tafsilotlaridan xabardor odamlarga tayanib xabar berdi, deb yozadi “RBK”.

Bortda bo‘lgan ikkita “qora quti”dan birining bort o‘ziyozarlaridan olingan ma’lumot shundan darak bergan. Olingan axborotga ko‘ra, samolyotda ikkita dvigateldan birining tortuvchi avtomati ishlamay qolgan.

Yo‘riqnomaga ko‘ra tizim o‘chirilishi kerak edi, ammo ekipaj muammoni bartaraf qilishga uringan. Nashr qayd etishicha, dvigatellarni boshqarish tizimi bilan bog‘liq bunday nosozliklar ularning har xil quvvat bilan ishlashiga olib keladi, oqibatda samolyotni boshqarish qiyinlashadi, bu esa uchuvchilarni xavfsiz parvozni ta’minlashdan chalg‘itadi.

Indoneziya Transportdagi xavfsizlik qo‘mitasi rahbari o‘rinbosari Xario Satmiko ma’lum qilishicha, tekshiruvchilar halokat tafsilotlarini tushuntirib bera olishi mumkin bo‘lgan ikkinchi bort o‘ziyozarini qidirmoqda. U tergovchilar tortuvchi avtomat bilan bog‘liq muammo variantini ko‘rib chiqayotganini tasdiqladi.

Manbalardan birining aytishicha, ushbu Boeing samolyotining bundan avvalgi parvozini boshqargan uchuvchilar ham shunga o‘xshash muammolarga duch kelgan. Sriwijaya Air bunga izoh berganicha yo‘q.

Aviahalokat 9-yanvar kuni sodir bo‘ldi, layner Male oroli yaqinidagi Yavan dengizida halokatga uchradi. Uning bortida 62 kishi: 50 nafar yo‘lovchi, shu jumladan, o‘n nafar bola, shuningdek, 12 nafar ekipaj a’zosi bor edi, ularning barchasi halok bo‘ldi.

SJ182 reysini amalga oshirayotgan layner Indoneziyaning G‘arbiy Kalimantan provinsiyasi ma’muriy markazi bo‘lgan Pontianak shahriga yo‘l olgan. Samolyot mahalliy vaqt bilan soat 14:36 da Jakartadan uchib chiqqanidan keyin darhol radarlardan g‘oyib bo‘lgan va dispetcherlarga javob bermay qo‘ygan.

Keyinroq Meteorologiya, iqlim va geofizika agentligi vakili Deni Septiadi samolyot kuchli turbulentlik zonasiga tushib qolganini ma’lum qildi.

Transportda xavfsizlik bo‘yicha milliy komissiyaning aviatsiya xavfsizligini tekshirish bo‘limi rahbari Nurkaxio Utomo Boeing 737-524 yo‘lovchi samolyoti suvga urilish oqibatida parchalanib ketgan bo‘lishi mumkinligini ma’lum qildi.

Mutaxassislarning ta’kidlashicha, samolyotning halokatga uchrashiga uning pandemiya sabab bir necha oy parvozsiz turib qolgani ham sabab bo‘lgan bo‘lishi mumkin.